Александр Дмитриев-Чүмэчи кэриэһигэр ырыа куонкурса ыытылынна

Быйыл Кэбээйи улууһугар аан-бастаан, биир дойдулаахтара, мелодист, ырыаһыт Александр Дмитриев-Чүмэчи кэриэһигэр үһүс республика таһымнаах аһаҕас ырыа конкурсун тэрийэн ыыттылар. Манна Кэбээйи, Мэҥэ-Хаҥалас, Уус-Алдан, Горнай улуустарыттан биллэр-көстөр, итиэннэ саҥа тахсан эрэр 23 ырыаһыт кэлэн кытынна. Биир дойдулаахпыт талааннаах ырыаһыт, мелодист Александр Дмитриев-Чүмэчи бэйэтин кэмигэр дьон өйүгэр-санаатыгар иҥэн хаалбыт үгүс иэйиилээх ырыаны суруйан хаалларбыта. Олоро, үлэлии сылдьыбыт улуустарыгар Мэҥэ-Хаҥаласка, Уус-Алдаҥҥа бу аһаҕас республикатааҕы конкурс үрдүк таһымнаахтык ыытыллыбыта. Кэбээйи улууһун киинигэр буолбут аһаҕас конкурска Александр Дмитриев-Чүмэчини кытта бииргэ алтыспыт доҕотторо, кини талааныгар сүгүрүйээччилэр, саҥа тахсан эрэр эдэр ырыаһыттар көхтөөх кыттыыны ыллылар. Сорох кыттааччылар нүөмэрдэрин тыыннаах музыканан доҕуһуоллаабыттара ордук кэрэтик, дьүрүскэнник иһилиннэ. Дьоро киэһэҕэ конкурс кыттыылаахтара Александр Дмитриев-Чүмэчи 11 ырыатын толордулар. Дьүүллүүр сүбэ ырыаһыттарга, кини ырыатын тарҕатааччыларга араас анал ааттары туттарда, дипломаннары, лауреаттары эҕэрдэлээтэ. Быйылгы үһүс аһаҕас республикатааҕы конкурс кыайыылааҕынан Дьокуускай куораттан кэлбит, биир дойдулаахпыт, саха эстрадатыгар тахсан эрэр талааннаах ырыаһыт Константин Степанов Гран-При үрдүк аатыгар тигистэ. «Умай, умай Чумэчи» аһаҕас ырыа конкурса биир дойдулаахпыт Александр Дмитриев ырыаларын санатан, саҥа талааннары арыйан, үс улууһу ситимнээн, сыалын-соругун ситтэ.

Видео Александр Дмитриев-Чүмэчи кэриэһигэр ырыа куонкурса ыытылынна канала НВК Саха