Эйиэхэ сибэкки биэрээри. Константин Степанов

Эйиэхэ сибэкки биэрээри. Марфа Куличкина тыллара, Александр Дмитриев - Чүмэчи мелодията.
Константин Степанов толоруута.

*****
Марфа Куличкина хоһооно (15.09.1986)
СИБЭККИ БИЭРЭЭРИ

Эйигин аларга көрсөөрү,
Эйиэхэ сибэкки биэрээри,
Эн үөрбүт дьүһүҥҥүн көрөөрү,
Эн сэргиир тылларгын истээри ...

Сииктээх от устунан оргууйдук
Эйигин кэтэһэ хаамабын,
Сибиэһэй сибэкки сытынан
Дуоһуйа дириҥник тыынабын.

Ол көмүс сардаҥа утаҕа
Таммахха чаҕылла оонньоото,
Куотуо диэн ааттаһан, сэрэнэн
Нарыннык, уһуннук уураата.

Симиин тыал наҕыллык сипсийэн:
"Ыксаама, кэтэс", - диэн сэрэттэ,
Ол кэннэ арахсан барбакка
Миигинниин сэргэстии сырытта.

Эн нарын тарбаххын тутаары,
Сэргэстии сиэттиһэ хаамаары,
Эйиэхэ биир тылы этээри,
Сүрэҕим кистэлин аһаары ...

*****
Хаартыскалар:
Alexander Dersu: http://dersu.gallery.ru/
Вячеслав Данилов http://dnevniki.ykt.ru/patriot7
Олег Бойко http://dnevniki.ykt.ru/Антагонист

Видео Эйиэхэ сибэкки биэрээри. Константин Степанов канала Ырыа ыллыга