Тошкентда ичимлик суви тарифларининг кескин ошиши ростми?

Тошкент шаҳар ҳокимлиги «Тошкент шаҳрида ичимлик сув таъминоти ва оқова сув хизматлари учун тартибга солинадиган нархларни белгилаш чора-тадбирлари тўғрисида»ги қарор лойиҳаси билан «Тошкент шаҳар сув таъминоти» МЧЖнинг ҳозирги кунда амалда бўлган тарифини оширишни таклиф этмоқда.
Жамоатчилик муҳокамаси учун эълон қилинган ҳужжат лойиҳасида қайд этилишича, «Тошкент шаҳар сув таъминоти» МЧЖ 2019 йилда молиявий иқтисодий фаолиятдан 58,8 миллиард сўм ҳамда 2020 йилнинг 8 ойида 21,3 миллиард сўм зарар кўрган.
Жамиятнинг молиявий аҳволидан келиб чиқиб, жамият томонидан тақдим қилинаётган ичимлик суви ва канализация хизмати учун ишлаб чиқилган тарифларни қайтадан кўриб чиқиш учун ишчи гуруҳ тузилиши сўралмоқда.
Янги таклиф этилаётган тарифларда қуйидаги нарх даражаларини белгилаш таклиф этилаяпти.
1 куб метр ичимлик суви учун тарифлар:
аҳоли, бюджет ва улгуржи истеъмолчилар учун (қўшимча қиймат солиғисиз) 310 сўмдан 500 сўмга (161,2 фоиз);
тижорат ташкилотлари учун 730 сўмдан 1500 сўмга (205,4 фоиз) ўсиши;
Шунингдек, канализация хизматлари учун тарифлар:
аҳоли, бюджет ва улгуржи истеъмолчилар учун (қўшимча қиймат солиғисиз) 250 сўмдан 350 сўмга (140 фоиз);
тижорат ташкилотлари учун 460 сўмдан 820 сўмга (178,2 фоиз) ўсиши кутилмоқда.
Маълумот учун, Тошкент шаҳрига 7 та ичимлик сув иншооти (Қодирия — 1815 минг м3/сут), (Қибрай — 153,1 минг м3/сут), (Жанубий — 40 минг м3/сут), (Қора сув — 8,5 минг м3/сут), (Сергели — 9 минг м3/сут), (Бектемир — 4,2 минг м3/сут) томонидан, жами 2 миллион куб метр ичимлик суви етказиб берилмоқда.
Ичимлик суви етказиб бериш 2018 йилда жами 794 миллион куб метрни ташкил этган бўлса, 2019 йилда 696 миллион метр кубга қисқартирилди (ичимлик суви ҳажми 98 минг м3 га ёки 12,4 фоизга қисқартирилган). Шунингдек, 2019 йилда ичимлик суви тармоқларида 11 155 та носозлик бартараф этилган. Бу кўрсаткич 2020 йилнинг 1 сентябрь холати бўйича 7430 тани ташкил этмоқда.
Аввалроқ Навоийда ичимлик суви ва канализация хизмати нархи қарийб 3 баравар оширилиши маълум бўлганди.

Видео Тошкентда ичимлик суви тарифларининг кескин ошиши ростми? канала UZBEK TV