Erməni zabitlərinin tamah saldığı Şelli kəndi- Nar bağları, istixanalar, əkin sahələri

"Yeni Müsavat" Media Qrupu olaraq Ağdama növbəti səfərimiz zamanı Şelli kəndinə də yollandıq.

Şelliyə getməmişdən əvvəl kəndin məşhur nar bağları haqda çox eşitmişdik. Yolboyu Şelliyə çatana qədər gözümüzün qarşısında xarabalığa çevrilmiş kənd canlanır. Düşünürük ki, ermənilər bu kəndi də viran qoyub. Evləri dağıdıb, ağacları məhv edib, daş üstündə daş qoymayıb.

Amma düşündüklərimizin tam əksi bir mənzərə ilə qarşılaşırıq. Bu kənddə sağlam evlər, bağlar görürük. Düzünü desək çox da təəccüblənirik.

Əvvəlcə haqqında çox danışılan nar bağlarına üz tuturuq. Kənddə demək olar ki, bütün evlərin həyətində nar ağacları var. Şellinin müxtəlif yerlərində salınan ucsuz-bucaqsız nar bağları da göz oxşayır.

Ağacların üstündə bar var. Amma narların çoxunu şaxta vurub. Axtarıb sağlamlarını tapa, məşhur Şelli narının dadına baxa bilirik.

Ermənilər Şelli narının qədrini bilib və yaxşıca qazanc əldə ediblər. Əsasən də Ermənistanda şərabçılıqda Şelli narı bazarlarda yaxşı tanınıb.

Şellinin bol məhsullu nar bağları ermənilərin bu kəndə marağını xüsusi edib. Xeyli sayda erməni ailəsi burada məskunlaşıb, təsərrüfatla məşğul olub. Öyrənirik ki, burada əsasən erməni zabitlər təsərrüfata maraqlı olub.

Bu kənddə yeni salınan bir neçə yeni nar bağlarını da görürük. Nar bağlarından əlavə heyvandarlıq da burada geniş yayılıb. Kənd ərazisində bir neçə böyük istixana, hektarlarla tütün və qarğıdalı sahələri də diqqətimizi çəkir.

Kənddə məskunlaşan ermənilər yeni binalar və evlər də inşa ediblər. Ağdam təhvil veriləndə isə mümkün olan qədər evlərdən və təsərrüfatlardan apara bildiklərini aparıblar. Qapı, pəncərə, daş örtükləri, elektrik dirəkləri, istixanalardakı avadanlıqlar və s. Bəzi evlər isə od vurularaq yandırılıb.

Şelli Ağdamın ən qısa zamanda canlanacaq, abadlaşacaq və sahiblərinə qovuşacaq kəndlərindən biri olacaq.

İlkin Muradov
Video: Rafət Şahbazov
Kanala abonə ol : https://www.youtube.com/TVmusavat
Email: Musavat7777@gmail.com

Kanala baxdığınız üçün təşəkkürlər

Видео Erməni zabitlərinin tamah saldığı Şelli kəndi- Nar bağları, istixanalar, əkin sahələri канала TV Musavat