Məlahət Kərimqızı "Dərdimdən ölürsən axı..."

...

Sən mənim dərdimdən ölürsən axı!
Niyə gizlədirsən demirsən mənə?
Qəlbin qan ağlayır, gülürsən axı...
Məgər bu cür həyat xoşdurmu sənə?

Sən orda, mən burda əzab çəkirik,
Vüsalın həsrəti doğrayır bizi
Qıvrılıb sancıdan nələr çəkirik?
Həyat puç eyləyir bu sevgimizi...

Sən mənim dərdimdən dəli divanə,
Mən sənsiz yarımcan, bilirsən bunu...
Sevgidə haram yox demiş Mövlanə,
Sevgisiz nə varsa, günahdır sonu...

Sən mənim dərdimdən Məcnun olmusan...
Neyçün Canı Cana həsrət qoyursan?
Sevgini qürura qurban verməzlər!
Bu saf məhəbbətə necə qıyırsan?

Sən mənim dərdimdən ölürsən axı,
Nə gecən var sənin, nə də gündüzün...
Bilirəm doğmayam, ruhuna yaxın,
Hər yerdə gözümü axtarır gözün...

Nə qədər dözecək, susacaq ürək?
Məgər ki sevgiyə ömür yetərmi?
Sevənlər sevgisin danmasın gərək!
Heç Canan Cananı Candan edərmi?

Gün gələr peşmanlıq duyar qəlbimiz..
Nə zaman,nə hisslər geri dönməz bil !
Eşqi yaşatmağı bacarmasaq biz,
Sevgimiz sönsə də, odu sönməz bil !

Tök daşı ətəkdən, qürurundan keç!
Dünən yox, sabah yox, sən bugünü seç!
Gəl ki, gəlişinlə yaşat dünyamı...
Sevgisiz bu həyat həyat deyil heç,
Sevgisiz bu həyat həyat deyil heç !

Məlahət Kərimqızı.✍️

Видео Məlahət Kərimqızı "Dərdimdən ölürsən axı..." канала Məlahət Kərimqızı