Neftçala sakini uzun illərdir adada tənha yaşayır

Vaxtı ilə Neftçalada böyük yaşayış məntəqəsi-əsl adı Kürdili olan Kurkasa kəndi düz 36 il bundan əvvəl dənizin suyu qalxdığından adaya çevrilib. O vaxtlar kəndin bütün sakinləri köçürülsə də, adada yeganə qalan Proninlər ailəsi olub. İndi o nəslin bir nümayəndəsi neçə illərdir ki, bu adada tək-tənha yaşayır.

Əvvəllər yarımadada yerləşən Kürdili kəndinin əhalisinin əksəriyyətini burada məskunlaşmış ruslar təşkil edib. Onlar burada azərbaycanlılarla birgə mehriban yaşayıblar. Ötən əsrin 80-ci illərinin əvvəlində, Xəzər dənizində suyun səviyyəsi qalxdığından buranın rayonla əlaqə kəsilib. Yarımada adaya çevrildikdən sonra bir neçə ailə istisna olmaqla əhalinin hamısı köçürülüb. Sonradan bu adanın yeganə sakinləri elə Proninlər ailəsi olub. İndi ailənin tək üzvü Vitali Pronin uzun illərdir ona doğmalaşmış bu adada tək-tənha yaşayır.

Ötən əsrin 80-ci illərinə kimi Kürdili rayonun ən abad, yaşayış üçün normal şərait yaradılmış kəndlərindən biri olub. Sonradan üç minə yaxın əhalinin yaşadığı bu kənddə bəzi evlər dəniz altında qalıb, bəziləri isə baxımsız olduğundan yararsız hala düşüb. Kənddə salınan 1200 hektar üzüm bağının 600 hektarını dəniz qərq edib. Bu illərdə ada əridiyindən indi onun uzunluğu 20, eni isə 12 kilometrə yaxın qalıb. Əvvəlki görkəmindən heç bir əsər-əlamət qalmayan kənddə 65 yaşlı Vitali Poronin gecələri lampa işığında keçirir. Ərzaq məhsullarının alınıb gətirilməsində isə balıqçılar ona yardım göstərir. Maraqlısı odur ki, hər tərəfi dənizlə əhatə olunmuş adada qazılmış quyudan şirin suyun çıxması Vitali üçün əsl möcüzə olub.

Vitali torpağa bağlı olduğundan həyətində bostan-tərəvəz məhsulları yetişdirir, eləcə də mal-qara saxlayır. Lakin burada şirin su tapmaq çətin olduğundan heyvanlar dəniz suyu içirlər. Bundan başqa Vitali kənddə yeni qəbiristanlıq da salıb. Köhnə qəbiristanlıq suyun altında qalanda, atasının və 2 qonşusunun məzarını bu qəbristanlığa köçürüb. Dənizin onları ayrı saldığını deyən Vitali bu adada tənha yaşamağın sirrini belə açıqlayır. Mən burda doğulmuşam, bu torpağın çörəyi ilə böyümüşəm. Axı, mən bu torpağı necə ata bilərəm? Elə son mənzilim də bu torpaqdır, bu adadır.

Видео Neftçala sakini uzun illərdir adada tənha yaşayır канала ARB Cenub