Cənub bölgəsində sürüşmə zonalarının sayı artır

Son günlər Cənub bölgəsində torpaq sürüşməsi yenidən aktivləşib. Bu dəfə Masallıda otlaq və əkin sahələrində aktivlik müşahidə olunur. Hazırda ən aktiv ərazi Güllütəpə kəndi ərazisindədir.

Masallı rayonunda sürüşməyə əsas aktiv olan ərazilər Zuvand və Güllütəpə kəndlərindədir. Artıq bir neçə dəfə bu ərazilərdə sürüşmə halları qeydə alınıb. Son günlər bölgəyə yağan intensiv yağışlar səbəbindən bu kəndlərdə aktivlik bir qədər də artıb. Sürüşmə daha çox kəndlərdə yaşayan insanlar üçün təhlükə yaradır. Sakinlər deyir ki,bu ərazilərdə mal-qaranı da başlı başına buraxa bilmirlər.

Kənd sakini Zahid Mütəllimov: “Torpaqda çatlar əmələ gəlir. Mal-qaranın qıçı ora düşüb sına bilər. Təhlükəlidi.”

Torpağ sürüşməsi Güllütəpədə artıq dörd vətəndaşın pay torpağını əhatə edir. Bu səbəbdən həmin ərazilərdə sakinlər əkin apara bilmir.

Kənd sakini Asif Bünyatov: “Yağış yağandan sonra həmin yerlər sürüşüb. Bizim otlaq sahələrimizdir ora. İndi orada əkin əkmək olmaz.”

Masallı rayon mərkəzindən 25 km məsafədə yerləşən Zuvand kəndindəki qədim sürüşmə sahəsində də aktivlik var. Burada isə evlər ziyan çəkib.

Kənd icra nümayəndəsi Əlövsət Muradov: “Köhnə Zuvand kəndinə də yağışlar nəticəsində həmin gecə torpaqların sürüşməsi baş vermişdir. Bir köhnə ev, yəni orada yaşayışı olmayan ev uçmuşdur. Digər bir evdə isə çatlar əmələ gəlmişdir. Güclü yağışlar yağarsa aktivlik müşahidə oluna bilər.”

Cənub bölgəsində torpaq sürüşməsi və çökmələr Masallı ilə yanaşı Lerik və Astara rayonlarında da ayrı ayrı ərazilərdə müşahidə olunur.

Видео Cənub bölgəsində sürüşmə zonalarının sayı artır канала ARB Cenub