“Ölümdən deyil, anamın bu xəbərə dözməyəcəyindən qorxuram” – TOFİQLƏ ANASINI AYIRAN 12 GÜN

“Bu vətən torpağın qara bağrında
Sıra dağlar kimi duranlarındır.
Bir tarix boyunca onun uğrunda,
Adını tarixə yazanlarındır”.

Vətən uğrunda canını fəda edib, adını tarixə yazdıran qəhrəmanlardan biri də Tofiq Əmirlidir.

Ermənilərin xalqımıza qarşı törətdiyi Xocalı soyqırımından bir gün sonra yəni, 27 fevral 1992-ci ildə Cəlilabad rayonunun Fətullaqışlaq kəndində dünyaya gəlib Əmirli Tofiq Şəmsəddin oğlu.

İbtidai təhsilini həmin kənddə aldıqdan sonra ailəsi ilə birgə rayonun Göytəpə şəhərinə köçüb. 2010-cu ildə Milli Qəhrəman Vüqar Mürsəlov adına Göytəpə şəhər 1 saylı tam orta məktəbi bitirib.
2011-2012-ci illərdə əsgərliyini Sərhəd qoşunlarında xidmət edərək başa vurur. Xidmətdə fərqləndiyinə görə, komandirləri tərəfindən bir neçə dəfə təltif edilir.

Hər dəfə Xocalı soyqırımından söz düşəndə “nə vaxt Xocalının qisasını alacağıq, o, vaxt başımız dik gəzəcəyik", - deyirdi.

Elə bəlkə də bu qisası yerdə qoymamaq üçün xidmətini başa vurduqdan sonra sənədlərini Dövlət Sərhəd Xidmətinə təqdim edir və xidmətə başlayır.
2018-ci ildə hərbiyə yüksək marağı olduğu üçün çətin təlimlərdən keçərək, Xüsusi Təyinatlı Qüvvələrin sıralarına qoşulur.
Vətəninə, dininə bağlılığı onu hər zaman ətrafındakılardan fərqləndirirdi. Xidməti dövründə nə qədər ciddi olsa da, zarafatlarından da geri qalmırdı.
Türkçü olaraq Kür Şadı, müsəlman olaraq da həzrəti Əlini özünə örnək götürən qəhrəmanımız şəhadəti ən şərəfli ölüm bilirdi. "Şəhidlik hər kəsə qismət olmur. Heç inanmıram, mənə də qismət ola", - deyirdi.
Sentyabrın 27-də isə gözlədiyi anın, Xocalı qisasını almağın vaxtı çatır. Qardaşına zəng edərək üstüörtülü olsa da döyüşə yollandığını deyir.
Oktyabrın 7-nə qədər Şimal cəbhəsində bir neçə uğurlu əməliyyatlara qatılır. Oktyabrın 8-dən isə Cəbrayıl istiqamətində əməliyyatlarda iştirak edir.
Yaxşı snayperçi olan Tofiq, Cəbrayıl istiqamətində ilk əməliyyatında axşam vaxtı irəliləyən bölmələrini qorumaq məqsədilə arxada snayper mövqeyində olur. Termal nişangahla ermənilərin bölmələrimizi mühasirəyə alaraq pusqu qurmaq cəhdlərini aşkar edir və məlumat verir. Tofiq snayper atışları ilə düşmənə xeyli itki verdirir, bölük mühasirədən qurtulur. Daha sonra döyüş mövqeyindən çıxaraq bölüyünə köməyə gedir, yaralı dostunu çiyninə alaraq tibb məntəqəsinə çatdırır.

Ağır döyüşlərdən sonra bölmələrinin su ehtiyatı tükənir, susuzluq hər kəsi haldan salır. Tofiq əvvəl keçdiyi ərazidə su gördüyünü və nə olur olsun gedib su gətirəcəyini komandirinə bildirir. Bunun üçün düşmən mövqelərindən görünən ərazilərdən keçmək lazım idi. Tofiq düşmənin minomyot, avtomat mərmilərinin altında əllərində su qabları qaçaraq gedib yoldaşlarına su gətirir.

Oktyabrın 13-ü səhərə yaxın Cəbrayılın Minək kəndi uğrunda gedən döyüşlərdə Tofiq Əmirli yanına minomyot mərmisi düşməsi nəticəsində şəhid olur.
Gizir Tofiq Əmirlinin qəhrəmanlığı dillərə dastan olur. Hətta Türkiyənin televiziya kanallarında da şəhid gizirimizin qəhrəmanlığından danışılır.
Ax! Gecələr yatmamışam,
Mən sənə lay-lay demişəm.

Sən yatalı, mən gözümə
Ulduzları say demişəm.

Hər kəs sənə ulduz deyə,
Özüm sənə ay demişəm.

Sabahlara qədər lay-lay deyib böyütdüyü oğlunu itirən anası onun yoxluğuna dayana bilmir. Oğlunun şəhid olmasından düz 12 gün sonra o da həyata əlvida deyir.

“Allah, özümü öldürə bilmirəm, günahdır, sən özün məni öldür”, - deyə hər gün Allaha dua edirmiş anası Xatirə xanım.

Şəhidin atası Şəmsəddin Əmirli deyir ki, oğlu həmişə şəhid olmaqdan qorxmadığını, lakin anasının bu dərdə dözməyəcəyindən narahat olduğunu deyirmiş. Elə belə də olur. Tofiqdən sonra anası da dünyasını dəyişir.

Atasının sözlərinə görə, Tofiq özünə ev tikmək üçün qəsəbədə torpaq alır. Amma əmisinin darısqal evdə yaşadığını görüb buna dözməyir və torpağın yarısını ona verir. Öz evini tikmək isə ona qismət olmur. Ancaq atası oğlunun arzusunda olduğu evi o torpaqda tikəcəyini deyir.

Qəhrəmanımızın illərdir dəyişdirmədiyi sosial şəbəkədəki statusu isə onun həyat devizi idi.
Sən ölümünlə arzusunda olduğun o şəhadətə qovuşdun Şəhidim. Uğrunda canından keçdiyin torpaq da azaddır indi.

Видео “Ölümdən deyil, anamın bu xəbərə dözməyəcəyindən qorxuram” – TOFİQLƏ ANASINI AYIRAN 12 GÜN канала Belə Bir Hadisə Olub