Мирас Асан. "Өзім жәйлі..."

Поэзия менімен егіз бе едің...
М.М.
Мирас Асан қазіргі жас ақындардың арасындағы су жорғасы. Өзіме қатты ұнайды.
Ойлы жазады. Қаламы мұқалмасын!

***
Өзіме-өзім қарап тұрмын сыртымнан,
Маған мүлде ұқсамайды түр-тұлғам.
Мынау мендік жүрек емес қап-қатты,
Мынау менің жейдем емес жыртылған.

Еркімнен тыс шығатындай зарлы үнім,
Өткен шақта көрем, сезем барлығын.
Мені елемей тұрған сынды ғашығым,
Мені аңғармай тұрған сынды тағдырым.

Кеудем боп-бос қаңыраған кеңістік,
Жүйкем дал-дұл, сөздерімнің көбі істік.
Мынау менің басым емес ең қымбат,
Мынау менің жасым емес ең ыстық.

Көмей-дағы күміс емес, тат перне,
Өзіме-өзім бейтаныспын, жат пенде.
Мені ұмытып кеткен сынды адамдар,
Өздері үшін ең маңызсыз сәттерге...

Шығам дағы биіктеу бір белеске,
Еске аламын бәрін-бәрін, тек еске...
Мені тастап кеткен сынды махаббат,
Үнсіздікке,
Сағынышқа,
Елеске.

Айғайымнан түк шықпайды қарлығып,
Мені ұмытып кеткен сынды жаңғырық.
Мені айналып өткен сынды жер шары,
Мен ойланып кеткем сынды мәңгілік.

Қайда бәрі, қарлығаш-ой, жыр-ұя?
Қайда жазым қызыл-жасыл дүрия?
Мені үгітіп жатқан сынды уақыт,
Мені ұмытып кеткен сынды дүния.

#әсерліпоэзия
#нартайсауданбекұлы

Видео Мирас Асан. "Өзім жәйлі..." канала Nartay Saudanbekuly