Қазақшаң қалай, Парламент?

Жыл сайын Парламент мәжілісіндегі депутаттардың мемлекеттік тіл меңгеруін жетілдіруге ел қазынасынан миллиондар бөлінбеуі мүмкін. Өйткені, мәжіліс төрағасы Ерлан Қошанов онсыз да көп депутат өз бетінше мемлекеттік тіл курстарына барып жүргенін айтты. Мәжіліс тіл үйрену үшін алдағы уақытта бюджеттен қаражат шығындамауы мүмкін деген төраға қазір депутаттардың арасындағы түрлі ұлт өкілдері қазақ тілін бір кісідей біледі дейді. Ал, кейбір мәжілісмен терминдерді жетік меңгеру үшін ел бюджетінен тіл үйренуге қаражат бөлінгені дұрыс десе, кейбірі әркім өз ақшасына үйренсін деп санайды.
Мәжілісмен Ерлан Саировтың есебінше қазір әріптестерінің 80 пайызы қазақша түсінеді, сөйлеп, ойын жеткізе алады. Ал, тағы да қажеттілік болса әр депутат өзі үшін өз қаражатына тілді үйренуі керек дейді.
ЕРЛАН САИРОВ, ҚР Парламенті Мәжілісінің депутаты:
– Үкіметтің жиналыстарының барлығы мемлекеттік тілде өтеді. Мәжілістің отырысы, комитет отырыстарының 80, 90 пайызы мемлекеттік тілде өтеді. Сондықтан менің ойымша белгілі бір межеге жеттік. Бірақ, әрі қарай бұл жұмысты жүйелі түрде дамыту керек.
Ал, аманаттық Айдос Сарым депутаттардың мемлекеттік тілді білуіне деп жыл сайын жұмсалатын жиырма жеті миллион теңге аса көп қаражат емес, заңның тілін жетік білу бәрімізге қажет дейді. Заң тілі көркем әдебиет пен шығарма секілді емес, сондықтан қай ұлттың өкілі болмасын депутат болғандықтан, жетілдіріп отыруы керек деген пікірде.
АЙДОС САРЫМ, ҚР Парламенті Мәжілісінің депутаты:
– Қазақстанның Парламентінде мемлекеттік тілді білмеу меніңше жаңсақтық. Ол бәлкім керемет шешен болып кетпесін, Қазтуған жыраудың жырларын зерттеп кетпесін, бірақ, енді кем дегенде алдына келген азаматпен сіз-біздесіп, сөйлесе алатын немесе біреу пікір айтып жатса ығы-жығына дейін болмаса да негізін түсінетіндей дәреже керек қой.
Ал, Мәжіліс төрағасы депутаттардың тіл біліктілігін арттыруына қаражат бөлу үрдісі бұрыннан бар деді. Өйткені, әр түрлі саланың маманы болғандықтан кей депутат кей саладағы терминдерді білмеуі мүмкін. Қажеттілік осыдан туындаған. Алайда, қазір дәл бұрынғыдай қажеттілік жоқ деді. Өйткені, онсыз да депутаттың көбі қазір өз қаражатына меңгеріп жүр.
ЕРЛАН ҚОШАНОВ, ҚР Парламенті Мәжілісінің Төрағасы:
– Заң шығарудың тілі ерекше өзінің бар. Терминдері бар, басқа бар. Ол үшін әрине депутаттардың да біліктілігін арттыру керек. Енді депутаттар әр саладан келген. Мысалы үшін әр мамандықтың иелері ғой, олардың барлығы заңгер емес. Сондықтан, әрине бұндай кезінде курстар қажет болғандықтан мен ойлаймын сол қосылған, жасалған жағдай. Енді біз қараймыз әрі қарай тиімділігі бар болатын болса біз оны қалдырамыз, әйтпесе оны жауып тастаймыз.
Айта кетейік, Геннадий Шиповских, Наталья Деменьтева, Снежанна Имашева секілді мәжілісмендер мемлекеттік тілде еркін сөйлей алады. Ал, Аманжан Жамалов, Айдын Қоңыров, Айгүл Жұмабаевалар депутаттық сауалдарын үнемі орыс тілінде жолдап жүр.
Айбар Төлжанұлы, Нұркен Тоқмурзин
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Парламент #ҚазақТілі #тренинг #мемлекеттік_тіл

Видео Қазақшаң қалай, Парламент? канала Информбюро 31