Солтүстік Қазақстанда 42 мың гектар жерді өздеріне қайтара алмай жүрген тұрғындар тағы бас көтерді

Солтүстік Қазақстан облысында 42 мың гектар жерді өздеріне қайтара алмай жүрген тұрғындар тағы бас көтерді. Аудандық әкімдік ғимаратының алдына жиналған бес ауылдың халқы жергілікті биліктен жерлерін банктегі кепілден шығаруды талап етеді. Себебі, халықтың жерін иеленіп отырған қалталы азаматтар не өздері қолданбайды, не басқаларға бермейді дейді. Ал 42 мың гектар жер биыл тіпті, егілмей бос қалған жатыр екен.
Бір жыл бұрын дәл осы жерге жиналып, жеріміз аукционнан сатылмасын деп талап қойған азаматтар бұл жолы телімді банктен кепілден шығаруды талап етіп келген. Олар бір жылдың ішінде сот жиналыс хаттамасын заңсыз деп танығанын, бірақ соған қарамастан жерлерін кепілден босатпағанын айтады. Аудан әкімдігінің алдына жиналған жүзге жуық азамат бес ауылдың жерін қайтарып берсін дейді.
ЖАҚСЫЛЫҚ ЫСҚАҚОВ, Дәуқара ауылының тұрғыны:
– Біз жерден айырылсақ не болдық. Құнымыз бес- ақ тиын. Көріп жатырсыздар бүкіл жерде. Бізде де солай ауылдың жан жағын қоршап тастайды да сыртқа шығармайды. Шөп те шаба алмай, мал баға алмаймыз.
Жиналғандар сөзінше, бұған дейінгі кәсіпкер пайларын төлемей, тіпті жерді кепілге қойып кетіп қалған. Содан бері 42 мың гектар халықтың жері ұстағанның қолында тістегеннің аузында кетті деп ашулы. Өткен қыста пайдың аздығынан көбінің малы қырылып қалған. Биыл егістік науқаны тіпті басталмай, мыңдаған гектер бос жатыр дейді халық. Айтуларынша, ауыл шаруашылығы министрлігіндегі жауапты азаматтар мен қалталы кәсіпкерлер халықты жерсіз қалдырған.
БАҚЫТ МАХМЕТОВА, Егіндіағаш ауылының тұрғыны:
– Шынын айтқанда маған жер керек жоқ. Даладан екі метр бұйырсын. Бірақ келешек елім қайда, жастар қайда? Сол үшін осы жерге келіп отырмын мен.
Аудан әкімі бір сағатқа жуық әкімдіктің алдында тұрған адамдардың алдына шықпады. Әкімдік ғимаратына шақырып, былтыр жерде жұмыс істеген кәсіпкер биыл да егін егетінін, енді оны өздері де іздеп таба алмай жүргенін айтты.
ДАРХАН АМРИН, Айыртау ауданының әкімі:
– 15 мамырға қарай жерге егу жұмыстары жүргізілуі тиіс еді. Бірақ, өкінішке орай, олай болмады. Бұл жерге барып өзіміз егін еге алмаймыз. Өйткені бұл жеке меншік, бизнес. Бұны сіздер өздеріңіз шешулеріңіз керек.
Жергілікті биліктен көмек болмады деген жұрт, әрі қарай ауыл шаруашылығы министрі мен депутаттардың алдына барамыз дейді.

Руслан Жасұланұлы, Қуаныш Әлтенов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#жер_дауы #наразылық #СҚО

Видео Солтүстік Қазақстанда 42 мың гектар жерді өздеріне қайтара алмай жүрген тұрғындар тағы бас көтерді канала Информбюро 31