Велигден во манастирот Св. Петар и Павле, Бистрица, велешко

ВЕЛИГДЕН
04.05.2013-та

И оваа ноќ ги гледам. Лежам и ги гледам ѕвездите. Секаде во светот ѕвездите се сјајни, но над македонското небо светат најсилно и најубаво. Сам сум. Неколку дена сам во пазувите на Јакупица во централна Македонија. Лежам во лулашката во дворот на манастирот Св. Петар и Павле над селото Бистрица. Славејчињата ја крунисуваат ноќта со природна симфонија, бувот повремено се јавува. Во далечината се слушаат камбаните од селската црква Св. Богородица.
Полноќ е. Селаните се собрале во црквата да го пречекаат Велигден. Ноќе на Велигден, овде во манастирот, никој не навраќа . Го повлекувам јажето од камбаната и тоа пет пати одѕвонува да се израдува новиот манастир, да знае дека не е сам. Влегувам во манастирот и палам свеќи за сите кои ги познавам, за најблиските. Палам свеќа за Бога, палам за Македонија и за сите Македонци. Палам за тебе, која и да си. За твое здравје, да имаш среќа и многу љубов.
Помина полноќ. Веќе е 05.05.2013. Недела, нов ден и нова среќа. Сам, а толку среќен. Бесконечна е мојата среќа овие пет дена, бидејќи го привршувам и препрочитувам по шеснаесетти пат ова прекрасно дело „Бог е жив“. И тоа токму овде, на свето место. За да ја почувствуваш мојава бесконечна среќа ти подарувам и тебе мал дел од неа. Но, бесконечноста не може да се подели, колку и да ја делиш секогаш е бесконечна. Токму и затоа сега и ти ја имаш истата бесконечна среќа. Ја имаш бесконечната вселена и бесконечната Вистина. Го имаш и Бога бидејќи тој е жив и живее во твојата душа, а ти си дел од Него. Верувај ти не си сама, секогаш има некој кој многу те сака и ти дава безусловна љубов. БОГ Е ЖИВ И БОГ Е ЉУБОВ!
„Два дена се најважни во твојот живот: денот кога си се родил и денот кога ќе дознаеш зошто!“
Извадок од „Бог е жив“ (објавена 2013 година) – Ниче Димовски Македон

Видео Велигден во манастирот Св. Петар и Павле, Бистрица, велешко канала Niche Dimovski