"Новае неба" - Чаканне Калядаў (1996)

Словы Міхала Анемпадыстава
http://knihi.com/Michal_Aniempadystau/My_cakali_Kaladau_z_malenstva.html

Мы чакалі Калядаў з маленства
І ніяк не маглі дачакацца:
Тату трэба было на работу,
Маці трэба было на працу.

А Гагарын ляцеў на ракеце
Па-над нашым дваром ды садам.
Мы глядзелі ўслед са здзіўленнем
І міжволі чакалі Калядаў.

Мы увосень падпальвалі лісце,
Мы узімку хварэлі на гланды
І прыклаўшы далоні да вуснаў,
У цямрэчы чакалі Калядаў.

Мы пісалі ў школе дыктоўкі,
Нас вадзілі глядзець на парады,
Прафсаюз выдаваў карамелькі
Мы бралі і чакалі Калядаў.

Нам даводзілі, хто мы і што мы,
Нас вучылі выконваць загады,
Нам казалі, ды мы не чулі -
Мы употай чакалі Калядаў

Мы рабілі высновы хутка,
Мы павольна спявалі балады
Мы назлосць валасы расцілі
І ўпарта чакалі Калядаў.

Што з таго, што ўсё гэта знікла
Быццам бурбалкі ад ліманаду?
Засталіся сям'я і дзеткі,
Засталося чаканне Калядаў.

Засталіся сябры ды праца
А адзін, дык «вабшчэ» ў Канадзе.
Мы на святы дашлем паштоўку,
Будзем разам чакаць Калядаў.

Позна ўвечары посуд памыем
І пакінем, каб сохнуў на тацы.
Мы чакаем Каляды з маленства
І не можам ніяк дачакацца.

Видео "Новае неба" - Чаканне Калядаў (1996) канала secondbelarus