Халық жерсіз қалып отыр! Алматы облысында тұрғындар мен серіктестік арасында жанжал туды

Алматы облысындағы Көктал ауылының тұрғындары бір ғана серіктестікке берілген мың гектардан астам жердің халыққа қайтарылуын талап етті. Айтуларынша, «Көктал агро» серіктестігінің қожайындары ауылдағы 1200 гектардан аса телімді қоршап, жан-жағын қазып, халықты жерсіз қалдырған. Ал, серіктестік басшылары жерді заңды түрде алып отырмыз, жұмысшымыздың көбі осы ауыл азаматтары дейді.
13 мың адам қоныстанған ауылда отырып не мал ұстай алмаймыз, не егін еге алмаймыз деген көкталдықтар шыдай-шыдай шаршадық дейді. Бүгін 300- ден аса тұрғын таң атпай жиналып, "Көктал агроға" қатысты реніштерін тізіп берді.
АЙДОС МАЛЫБАЕВ, Көктал ауылының тұрғыны:
– Мұны мал кірмес үшін қоршап тастаған. Мына қасқандықтары. Енді адам баласына келеді ме? Мың гектар жерімізді алып тұрып, оны осылай қоршап, оның сыртын қазып тастау деген сұмдық қой енді.
Ал ауыл тұрғындарына келген «Көктал агроның» директорын халық тыңдамады.
«Көктал агро» серіктестігінің директоры қазір 1150 бас сауынды сиыр ұстап, тәулігіне 13 тонна сүт алып, оны Талдықорғанға жөнетеміз дейді. Ал мың гектардан аса жерді қоршап алғанын жасырмайды.
Тұрғындардың айтуынша, мыңнан аса сауынды сиыр ұстап отырған «Көктал агро» тура ауылға тиіп тұр және онда санитарлық талаптар мүлдем сақталмайды. Серіктестік болса, барлық талап сақталған дейді. Ал аудан әкімі әдеттегідей бір серіктестікке жердің қалай берілгенін тексереміз деп шектелді.
ТАЛҒАТ ӨМІРӘЛИЕВ, Панфилов ауданының әкімі:
– Жердің мәселесін біз тексереміз. Заңды түрде. Осы жерде тұрып алып, жәй сөзбен "жерді тартып аламыз, мына жерді тартып береміз" деп мен айта алмаймын. Мен Үкіметтің адамымын.
«Көктал агро» мемлекет қойып отырған талаптың бәрін орындап жатырмыз дейді. 150 адамды жұмыспен қамтығандарын, оның сыртында 700 миллионға дейін инвестиция тартып жатқандарын айтады. Ал халық «Көктал агро» ашылғанда мыңдаған адамды жұмыспен қамтимыз деп уәде берген дейді. Сондықтан, "құрғақ уәдеге сеніп қалдық" деген көкталдықтар жерді қайтарып алғылары келеді.
Самал Қабышева, Мерей Толқынов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#жер_дауы #жанжал

Видео Халық жерсіз қалып отыр! Алматы облысында тұрғындар мен серіктестік арасында жанжал туды канала Информбюро 31