Қазақстанда лауазымды қызметкерлер бірінен соң бірі қызметтен босатылып жатыр

Қазақстанда дүрбелең басталғалы бірқатар лауазымды қызметкерлер бірінен соң бірі жұмысынан кетіп жатыр. Бүгін мемлекет басшысы Қасым-Жомарт Тоқаевтың өкімімен Ұлттық қауіпсіздік комитеті Төрағасының бірінші орынбасары Самат Әбіш лауазымынан босатылды. Ал, "Атамекен" кәсіпкерлер палатасының басқарма төрағасы Тимур Құлыбаев қызметінен өз еркімен кетті. Құлыбаев секілді, QazaqGaz ұлттық компаниясының басқарма төрағасы Қайрат Шәріпбаев пен "ҚазТрансОйл" компаниясының басқарма төрағасы Димаш Досанов та орындарын босатқан. Ал, үш бірдей айып тағылып отырған экс-шенеунік Кәрім Мәсімов қазір тергеліп жатыр.
Алматы қанға боялған түні, яғни, қаңтардың 5-інен 6-сына қараған түні Мемлекет басшысы сол кездегі Ұлттық қауіпсіздік комитетінің төрағасы Кәрім Мәсімовты қызметінен босатты. Ертеңінде-ақ, Мәсімов пен оның екі орынбасары - Ерғожин мен Садықұлов "мемлекетке опасыздық жасады" деген айыппен ұсталды.
Мәсімов қазір "билікті күшпен басып алуға әрекет жасады, лауазымдық өкілеттіктерін асыра пайдаланды" деген айыппен де тергеліп жатыр. Ал, бүгінге дейін Ұлттық қауіпсіздік комитетінің бірінші орынбасары болып келген Самат Әбіш Президенттің өкімімен қызметінен босатылды. 2010-жылдан бастап Ұлттық Қауіпсіздік комитетінде жұмыс істеген Самат Әбіш 2013-жылдан бастап төраға орынбасары, кейіннен, бірінші орынбасары болып қызмет атқарған. Тек орталықта ғана емес, Алматы қаласы, Қызылорда мен Қостанай облысының ұлттық қауіпсіздігін басқарған басшылар да орындарын босатты.
Ұлттық қауіпсіздікке жауапты басшылар тергеліп жатқанда, алпауыт «QazaqGaz» компаниясының басқарма төрағасы Қайрат Шәріпбаев пен «ҚазТрансОйлдың» басқарма төрағасы Димаш Досанов қызметтен кету туралы өздері арыз жазды. Самұрық Қазына Қорының баспасөз қызметі Шәріпбаев пен Досановтың өкілеттіліктері мерзімінен бұрын тоқтатылғанын хабарлады. Ал, бүгін миллиардер, сегіз жылдан бері Атамекен кәсіпкерлер палатасының басқарма төрағасы болған Тимур Құлыбаев та өз еркімен қызметінен кетті. Палата сайтында Құлыбаевтың әріптестеріне алғыс айтып, сәттілік тілеген үндеуі жарияланды.
Осы тұста Ішкі істер министрі Ерлан Тұрғымбаевтың бұйрығымен бүгін Павлодар облысы полиция департаментінің басшысы Нұрлан Мәсімов қызметінен кеткенін де айта кетейік. 23 жылдан бері ішкі істер органында еңбек етіп келген Мәсімов Павлодар облысының полиция департаментін 2019 жылдан бері басқарған.
Халық шулап жатқанда жұрттың алдына бірде-бір келмеді деп сынға ұшыраған Атырау қаласының әкімі Қайрат Оразбаев та өз еркімен қызметінен кетті. 30 желтоқсаннан бастап еңбек демалысында болған экс-шенеунік, тек оныншы қаңтарда қайта жұмысқа шыққан. Алайда, ертеңінде еңбекке жарамсыз анықтамасын әкелгені белгілі болды.
Үш күн бұрын Маңғыстау облысында газдың негізсіз қымбаттауына кінәлі болуы мүмкін деген күдікпен Энергетика вице-министрі Жұмабай Қарағаев ұсталды. Экс-шенеунікпен қатар облыстық Қаржылық мониторинг агенттігінің жедел-тергеу тобы электрондық сауда алаңдарының басшыларын да ұстағанын жариялады. Сот қаулысымен Қарағаев тергеу үшін екі айға қамалды.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#АлматыТрагедиясы #ауыс_түйіс #басшылар

Видео Қазақстанда лауазымды қызметкерлер бірінен соң бірі қызметтен босатылып жатыр канала Информбюро 31