Көпес В.М.Кубриннің үйі және үй жанындағы құрылысы

Көпес В.М.Кубриннің үйі және үй жанындағы құрылысы.
⠀
ХІХ ғасыр мен ХХ ғасырдың бірінші жартысындағы Ақмола қаласының тас сәулетті тарихи құрылысы біздің елордамыздың мәдени мұрасының едәуір бөлігін құрайды. Ақмола жеріне келген көпестердің қатарында Кубриндер әулеті де болған. Ақмола қаласының сыртқы келбетін безендірген ең әсем сәулет ғимараты 1909-1912 жылдары салынған көпес Василий Кубриннің тұрғын үйі болды.
⠀
В.Кубриннің бұрынғы үй-жайы - бұл тұрғын үйден және жертөлесі бар жапсаржайдан құралған кешен. Модерн мәнерінде салынған жапсаржайы – үй-жайдың ажырамас бөлігі болып табылады. Үй-жайдың ауласында ағылшын мәнерінде бау-бақша отырғызылған. Жекежай Мәскеу сәулетшісінің жобасы бойынша, жертөле қабаты биіктетілген, төрт қырлы күмбезі және тормен безендірілген балконы бар, бір қабатты жекежай түрінде салынған.
Ғимараттың қасбеттері симметриялы, орталық бөлігі басым және қиылысқа бағытталған. Жертөле бөлігі, шатыр мен күмбез ғимаратқа толыққандылық пен өзіндік үйлесімділік береді. Жоғары тіктөртбұрышты терезелер жапсырмалы жақтау маңдайшасымен ерекшеленген. Карниздер, терезе ойықтары мен қалаулары ХІХ ғасырдың кейінгі классицизм элементтерін еске салады.
⠀
Революциядан кейін, әр түрлі уақытта жекежайда жұмысшы-шаруалар клубы, кітапхана, қалалық уездік атқару комитеті орналасты. 1920 жылғы қазанда «Бірінші Советтер үйі» -деп оның атауы ресми өзгерді. Өз уақытында мұнда қалалық, уездік және аудандық БМСБ, ІІХК және милиция мекемелері болды. 60-шы жылдардың басында ғимаратта қалалық білім басқармасының бөлімі және Пионерлер үйі жұмыс істеді. Бірнеше жылдан кейін ғимарат кешені облыстық тарихи-өлкетану мұражайына берілді. 2003 жылдан бастап бұл ғимаратта Украин Республикасының Елшілігі орналасты. Қазіргі кезде бұл ғимарат Нұр-Сұлтан қаласының мемлекеттік мұрағатының меншігіне табысталды.
Кенесары көшесінің бойында орналасқан жекежай қазіргі уақытқа дейін астанамыздың ескі орталығын безендіріп тұрған ғимараттардың бірі болып қала береді.

Видео Көпес В.М.Кубриннің үйі және үй жанындағы құрылысы канала Monuments of Astana citү