Көктемгі мал төлдету жұмыстары жалғауда. Шу ауданы.

Шу ауданында мал төлдету науқаны жалғасуда. Қой төлдету – малшы үшін ең қиын да жауапты кезең. Не дегенімен қыстың аты қыс. Саулықтардың қоңы жұқарып шығады. Бабын тапса, барын беретін қойдың өнімділігі мен өсімталдығы жөнінде халқымыз «Мал өсірсе қой өсір, табысы оның көл-көсір» деп бекер айтпаған. Балуан Шолақ ауылының тұрғыны Марат Сағындықов осыдан он екі жыл бұрын мал шаруашылығын небәрі 23 ешкіден бастағанын айтады. Ата кәсіпті санаулы мал басынан бастаған «Ержан» шаруа қожалық жетекшісінің қоражайында қазір 700 қой мен 500 қозы және одан бөлек жүзге жуық ірі қарасы бар. Қаны таза қошқарларды сонау Әзірбайжан елінен әкелуді әдетке айналдырған шаруа иесінің өрістегі қазақы қойлары ірілігімен ерекшеленіп тұрады. Осылайша мал басын асылдандырудың тиімді әдісін меңгерген.
Науқанды кезеңдерде мая-мая шөп жинап, қыстық азықты артығымен алып, қыстың қаттылығынан қысылмай шыққан. Мал төлдету науқанында ауылдың тоғыз адамын жұмыспен қамтып, қажетінше қаражат беріп отыр. Қазіргі уақыт әсіресе сақманшылар үшін жауапты болмақ. Сондықтан олардың да бар жағдайын қажетінше жасап отыр. Марат Сағындықов өзі 40 жылдан бері мал дәрігерлік қызметті тізгіндеп келеді. Балаларын да осы кәсіппен айналысуға машықтап, бар жұмысты соларға сеніп тапсырады. Алласын аузынан тастамайтын Марат Сағындықов адамгершілікті алдаңғы орынға қойып, тапқан табысынан жағдайы төмен отбасыларға қол ұшын созудан аянып қалған емес. Атап өтерлігі, Найман Сұлтанбаев басқаратын бұл ауылдың тұрғындары жаппай мал өсірумен айналысады. Себебі мұндағы жердің шөбі шүйгін, малдың семіруіне қолайлы.
Жалпы «Ержан» шаруа қожалығында болған сапарымызда біз төл алу науқанының ойдағыдай жүріп жатқандығына куә болдық. Сөйтіп, ауыл байлығы болып саналатын төрт түлік мал басының көбейіп жатқандығына көңіліміз бір марқайып қалды.

Видео Көктемгі мал төлдету жұмыстары жалғауда. Шу ауданы. канала Жумахан Чекаев