Гиссар тұқымды қойлар 80-100 келіге дейін таза ет береді

«Мал өсірсең қой өсір, пайдасы оның көл-көсір». Алматы облысы Талғар ауданы Еңбекші ауылында тұратын Зейнолла Хуршудов өзінің ауласында ірі тұрпатты гиссар тұқымды қойларын бордақылайды.

Ерекшелігі бұл қойлар жылына екі рет төлдейді. Аталықтары 80 келіге дейін ет береді.

Қарапайым шаруа Зейнолла Махмудұлы гиссар қойларын осыдан 20 жыл бұрын Тәжікстаннан алып келген. Сол кезде 5 саулық, 1 қошқармен шаруасын бастапты. Бүгінде мал басын 200-ге жеткізіпті.

«Денелері ірі болып келетін бұл қойлардың ішінде салмағы 200 келі болатын аталықтар бар. Кейбіреуі 80-100 келіге дейін таза ет береді», – дейді шаруа.

Зейнолла Хуршудов, шаруа

-Мысалы, мериноспен будандастырып шығарылған 5 айлық тоқтылар 25-35 келі таза ет береді. Еділбай тұқымымен де будандастырылғандар бар. Олар семіз келеді. Бірқатар өңірлерден шаруа қожалықтары келіп көріп, осы қойлардан алып кетіп жатқандар да бар.

Гиссар тұқымын өндірістік мақсатта өсіру арқылы малды асылдандыруға болады. Кейінгі жылдары облыс шаруалары осы қойдың саулықтарын пайдалану арқылы мал басын көбейтуге кірісті. Мысалы, гисармен қазақтың арқар мериносын будандастыру нәтижесінде етті молынан беретін жаңа төл шығару ісі қолға алына бастады.

Қазір облыста сондай 3 шаруашылық бар. Бірі Нарынқол өңірінде өрісін кеңейтуде.

Зейнолла Хуршудов, шаруа

-Бұл қойлардың күтімі мен жеп-шөбі дұрыс болуы керек. Мал дәрігерлік шаралар қатаң орындалуы шарт. Сонда ғана жақсы өнім алуға болады. Гиссар ыстық-пен суыққа төзімді келеді. Аталығының бағасы 120-150 мың теңге жетеді.

Зейнолла Махмудұлы халықтың әлеуметтік жағдайын жақсартуға бағытталған үкіметтік бағдарламалардың барлығын қолдайды. Өзі де қалыс қалып отырған жоқ. Шағын ғана ауласында қойдан бөлек қоян өсіріп, үйрек пен қаз ұстайды. Малға қажетті азығы жеткілікті. Тіпті жем, кебек, түрлі дәрумен аралас мал азығын әзірлеп, сататын шағын цех ашқан. Сұраныс көп.

«Тек, ерінбей еңбек етсең, өзіңе де, елге де пайдаң тиеді», – дейді шаруа.

Авторлары: Алмас Садуқас, Нұрдәулет Жақсыбай

Видео Гиссар тұқымды қойлар 80-100 келіге дейін таза ет береді канала Khabar Novosti