Adam Mickiewicz. Niepewność (po osetyjsku)

Адам Мицкевич

ÆБÆЛВЫРДДЗИНАД

Куы нæ дæ уынын, уæд цæссыг нæ калын,
Куы дæ суынын, уæд та мæ зонд нæ сафын,
Дзæвгар-иу дæ куы нæ фенын мæ цæстæй,
Цыдæр хъуаг уæд вæййын, тыхсын æрмæстдæр;
Æмæ мæхимæ раттын фарст, æрхæндæг:
Уый у хæларад æви уарзт йæхæдæг?

Куы вæййыс дард, куы нæ цæуыс æмгæрон, –
Уæд-иу мæ зæрдыл нал лæууы дæ цæсгом.
Фæлæ уæддæр фæфиппайын æвæндон,
Мæ хъуыдытæм хæстæг кæй и дæ фæлгонц.
Æмæ мын ногæй арф хъуыдыйаг фарст у:
Уый у хæларад æви ‘цæгдæр уарзт у?

Тыхстæн-иу хатт, фæлæ æнхъæл нæ уыдтæн,
Æмæ дæ размæ ʻрхæсдзынæн мæ хъыгтæ;
Уыди мæ цыд æнæ фæндаг, æнæ сæр,
Нæ бамбæрстон, куыд дын суыдтон дæ къæсæр;
Æмæ та арф ныхъхъуыды кодтон фарстыл:
Хæларад кодта мæн дæумæ ʻви уарзт уыд?

Цæмæй æнæниз уай – мæ цард дæр раттин,
Кæд бахъæуа – зындонмæ ссарин асин;
Мæ зæрдæйы къæйных фæндон нæ дарын,
Дæ сæрвæлтау мæхи нывондæн хъарын;
Æмæ мын ногæй арф хъуыдыйаг фарст у:
Цы у, хæларад у, ‘ви ‘цæгдæр уарзт у?

Куы-иу æрæвæрыс дæ къух мæ армыл, –
Уæд-иу цыдæр æхцон æнцойад хатын,
Фæлæ мын уыцы фын мæ цард фæдавы,
Æвзонг зæрдæ та фыны кæлæн сафы,
Æмæ хъæрæй дзуапп домы фарстæн:
Хæларад у æрмæст, æви ма уарзт дæр?

Мæ сисы бынæй ацы зарæг гуырди,
Уæлдæр мон мын æххуысгæнæг нæ уыди;
Нæ йæ æмбарын, дис кæсы мæхимæ,
Кæм ыссардтон дзырдтæ, хъуыдытæ, рифмæ.
Фæстагмæ та ныгъуылын ногæй фарсты:
Хæларад мæ цырын кодта, ʻви уарзт уыд?

1825

Видео Adam Mickiewicz. Niepewność (po osetyjsku) канала Инал Плиев