Fakt va Fikr (Maxsus-6): Komilov Özbekistonning keyingi prezidenti kim bölişini oldindan aytdi

2021 йил 2 март куни Ўзбекистон Ташқи ишлар вазири Абдуллазиз Комилов Москвада россиялик ҳамкасби Сергей Лавров билан учрашди. Учрашувда Комилов шу йил октябр ойида Ўзбекистонда ўтказиладиган навбатдаги президентлик сайловларида ким ғолиб чиқишини олдиндан айтиб қўйди.

Ўзбнекистон президенти Шавкат Мирзиёевнинг жорий йилда Россияга қилиши режалаштирилаётган сафари муддатлари ҳақида гапиратуриб, Абдуллазиз Комилов: “Агар бу сафарни 24 октябрда ўтказиладиган президентлик сайловларигача амалга оширишга улгурмасак, сайлов ўтиши билан дарров уюштиришни мўлжаллаб турибмиз” – деди. Комиловнинг бу баёноти рус журналистлари қаршисида, Россия ташқи ишлар вазирлиги телеканалининг жонли эфирида янгради.

Кўрганингиздек, Комилов октябрдаги сайловда ким ғолиб чиқишига умуман шубҳа қилмаяпти. Комилов Лавровга: “Сиз хавотир олманг! Президентлик сайловларида “по-любому” Мирзиёев ғалаба қозонади ва келади шу Москвангизга” – деди.

Қисқаси, Абдуллазиз Комилов Ўзбекистонда 7 ойдан кейин ўтказиладиган президентлик сайловларида Шавкат Мирзиёев ғалаба қилиши ва ғалабадан сўнг Россияга сафар уюштириши шубҳасиз қисмат эканлигини очиқ айтди.

Эътибор берган бўлсангиз, Ўзбекистон ташқи ишлар вазирининг сенсацион баёноти янграши билан телекамера бир тепага қардию, жонли эфир узилиб қолди. Афтидан, Комилов туширган катта қовун парчалари рус телеоператорлари ва видеокамераларга сачраб, эфир каналига тиқилиб қолди.

Шу кунгача Ўзбекистонда жуда кўп амалдорлар қовун туширишган. Уларнинг кўпи саводсизлиги туфайли шу аҳволга тушишган. Лекин кимсан Совет КГБсидан чиққан Абдуллазиз Комилов шундай ҳол қўйишини шахсан мен кутмаган эдим. Чунки Комиловнинг Лавровга 2 март куни айтган гапи журналистлар қаршисида эмас, ёпиқ эшиклар ортида айтиладиган гап эди.

Азизлар!

Абдуллазиз Ҳофизовичга: “Каттадан-катта раҳмат!” - деймиз. Чунки тажрибали “чекист” ва дипломат 35 миллион ўзбек халқини “Навбатдаги президентлик сайловларда нима бўлар экан?” – деган ғавғолардан ҳалос қилди.

Фактларни ўрганинг ва фикр қилинг!

Бобомурод Абдуллаев

2021 йил 5 март

Видео Fakt va Fikr (Maxsus-6): Komilov Özbekistonning keyingi prezidenti kim bölişini oldindan aytdi канала Fakt va Fikr