БАРКАНОРИИ РАИСИ НОҲИЯИ ЗАФАРОБОДУ ШАҲРДОРИ БӮСТОН ВА РУСТАМ АЗИЗӢ

Президенти Тоҷикистон Эмомалӣ Раҳмон рӯзи 26 июни соли 2023 бо имзои 4 фармон, 1 амр ва 7 қарори ҳукумат дар сохторҳои давлатӣ боз як силсила тағйироти кадрӣ ба амал овард.
Аз ҷумла бо фармонҳои президент бо айни тавҷеҳи “бо сабаби ба кори дигар гузаштан” Ашурзода Раҷаб Рӯзӣ аз вазифаи раиси ноҳияи Зафаробод ва Муинӣ Мавсума Муинзода аз вазифаи раиси шаҳри Бӯстони вилояти Суғд, ҳамчунин бо амри президент яке аз олимони ҷавону ояндадори кишвар Азизӣ Рустам Анварзода низ “бо сабаби ба кори дигар гузаштан” аз вазифаи муовини мудири Маркази исломшиносӣ, як ниҳоди таҳқиқротии вобаста ба президенти Тоҷикистон озод карда шуданд.
Ҳамчунин бо қарорҳои ҳукумат рӯзи 26 июн бо чунин тавҷеҳ, яъне “бо сабаби ба кори дигар гузаштан” Ғаффорзода Нигорахон аз вазифаи муовини якуми раиси Кумитаи кор бо занон ва оила, Амирбекзода Ҳабибулло аз вазифаи муовини якуми раиси Кумитаи рушди сайёҳӣ озод карда шуданд. Ба кадом вазифаи дигар гузаштани Ҳабибулло Амирбекзода, Раҷаб Ашурзода ва Рустам Азизӣ эълон нашудааст, вале Ғаффорзода Нигорахон бо фармони президент ба ҷои Мавсума Муинӣ иҷрокунандаи вазифаи раиси шаҳри Бӯстони вилояти Суғд таъин гардида, Муинӣ, тавре қаблан хабар додем, аз номи ҳизби ҳокими халқии демократӣ дар интихоботи миёндавраӣ дар ҳавзаи №13 шаҳри Хуҷанд ҳамчун вакил ба Маҷлиси намояндагон, маҷлиси поёнии парлумони Тоҷикистон пешбарӣ шудааст.
Исмоилзода Зуфар Муртазохон, ки дар гузашта раиси ноҳияи Деваштич ва се соли охир раиси кумитаи экологии Маҷлиси намояндагон буд, рӯзи 26 июн бо фармони президент иҷрокунандаи вазифаи раиси ноҳияи Зафарободи вилояти Суғд таъин карда шуд.
Эмомалӣ Раҳмон рӯзи 26 июн бо имзои қарорҳои ҳукумат Сафарзода Дилшод Ғаниро муовини вазири маориф ва илм, Нуруллозода Фирӯзаро муовини якуми раиси Кумитаи кор бо занон ва оила, Холматиён Рустамро муовини якуми раиси Кумитаи рушди сайёҳӣ ва Салимзода Зиёдулло Нусратуллоро муовини раиси Кумитаи рушди сайёҳӣ таъйин карда, Файзулло Қувваталӣ Бобоҷонро ба мақоми директори қароргоҳи «Искандаркӯл»-и Дастгоҳи иҷроияи президент нишонд.

Видео БАРКАНОРИИ РАИСИ НОҲИЯИ ЗАФАРОБОДУ ШАҲРДОРИ БӮСТОН ВА РУСТАМ АЗИЗӢ канала Bomdod TV