2 балалуу жаш келиндин өлүмү, айыпталган аксакал: Таласта адамдар топтолушту

Бүгүн, 19-июнь күнү Талас шаардык сотунун имаратынын алдында 20га жакын адам нааразылык акциясына келишти. Бул тууралуу Turmush басылмасынын аймактык кабарчысы маалымдады.

Маалым болгондой, алар Талас шаардык сотунун судьясы Азирет Медеровго нааразычылык билдирип келишкенин айтышууда.

Келгендердин бири Эсенбек кызы Жыпардын айтымында, анын эжесин унаа менен уруп кетип өлтүргөн адамга карата акыйкат өкүм чыкпай жатат.

«Биз бүгүн бардык туугандарыбыз менен Талас шаардык сотуна нааразычылык менен келип жатабыз. 2020-жылдын 17-февралында Талас шаарындагы Ч.Айтматов көчөсүндө жөө адамдар өтүүчү тилкеде (пешеход) менин бир тууган эжем Иманбекова Кундузду унаа уруп кеткен. Эжем 6 метрге учуп кетип, ошол жерден мерт кеткен. Анын жолдошу дагы 5 жыл мурун унаа кырсыктан каза болгон. Эжем 12 жаштагы кызын, 6 жаштагы уулун жалгыз багып жаткан. Аркасында 2 баласы тоголок жетим калды. Балдары 60 жаштагы апамдын колунда калды. Эжем 35 жашта болчу. Унаа менен сүзгөн адам 69 жашта экен. Кандайдыр себептер менен улам сотту жылдырып отуруп, ал адамды 1 күн дагы кармабай чыгарып жиберишти. Ага өкүмдө жашы 69да болгону үчүн чыгарылды деп жазылып турат. Тоок уурдаган адамды 5 жыл камаган заманда кары деп киши өлтүргөн адамды чыгарып жибергени бизди сыздатып жатат. Көзү көрбөсө унаасын айдабасын. Сот отурумунан чыккандан кийин, «мени эч нерсе кыла албайсыңар» деп кетти. Сотту акча менен жапканча, ушул балдардын келечегине деп берип койсо да унчукпайт элек. Адилетсиз чечим чыгардың деп нааразы болуп келип олтурсак дагы сот чыкпай жатат», - деди ал

Толугу менен http://www.turmush.kg/news:403032

Видео 2 балалуу жаш келиндин өлүмү, айыпталган аксакал: Таласта адамдар топтолушту канала Aimak Akipress