Qəhrəman Şəhidimiz Mehrabın əziz xatirəsi

Mən bizim bu Qəhrəman Şəhidlərimizin Ata və Analarına üzümü tutub deyirəm: Vətənə belə İgid Oğullar bəxş etdiyiniz üçün, onlara Salur Qazan, Bamsı Beyrək qanı, Babək ruhu verdiyiniz üçün sizin qarşınızda biz baş əyirik. Siz bizim dastanlardakı Qanlı Qoca kimi müdrik Atalar, bu xalqa Qanturalı kimi igid oğullar bəxş etdiniz. Bu oğulların hünərinə biz Odlar Yurdumuzu yadelli düşmənlərdən xilas etdik. Bizə bu qələbə sevincini yaşatdığınız üçün bunun müqabilində bəs biz sizin üçün nələr etməliyik? 'Sağ olun Atalar' deyib, gedib sizin sayənizdə qurulan bu dinc-əminamanlı evimizdə oturub isti çayımızı içək? Sonra da rahat divanımızda oturub bizim bəzi özəl telekanalların gecə-gündüz nümayiş etdirdikləri o dronlara, robotlara, bayrakdarlara baxıb fəxr edək? Düzdür onların bizim bu qələbəmiz üçün böyük rolu olub. Amma unutmayaq ki, o cansız texnikaları da idarə edənlər bizim bu mərd Oğullarımız, Şəhidlərimiz olub.
Bir neçə gün əvvəl şəxsən mən õzüm Möhtərəm Prezidentimizin çıxışına qulaq asdım: - Şəhidlərimizə, onların Valideynlərinə, yaralı Əsgərlərimizə layiqincə qiymət verilməlidir... demişdi.
Düzdür, mən özüm nə jurnalistəm, nə də ki video-bloger. Sadəcə vaxtaşırı xalqımızın belə ağrılı-acılı günlərini əks etdirən (geniş profilli olmasa da) videolar hazırlayıram. Amma mən bu yaxında çoxlarının tanıdığı (adını indi qeyd etmirəm) bir video-blogerlə təsadüfən rastlaşdım. Onun 1-ci Qarabağ müharibəsi Şəhidlərindən bəhs edən çoxlu videoları var. Mən onun dediklərini sizə danışıram: 'Bizə bu qələbə çoxlu İgid Oğullarımızın qanı bahasına başa gəlib. Amma mən indi onlar haqqında mövzu hazırlaya bilmirəm. Çünki onlar barədə ətraflı məlumat, video-lent, şəkillər tapa bilmirəm. Onların yaxın-uzaq qohumları belə onlara aid şəkil, video verəndə elə bil ki, nədənsə çəkinirlər..' Bəlkə də çoxları onun bu sözlərinə inanmayacaq. Amma mən inanıram. Çünkü mən Qəhrəman Şəhidimiz barədə bu videonu cəmi 4 şəkillə hazırlamışam.
2 gün öncə Şəhidlərimizi ziyarət etmək üçün Xiyabana getmişdim. Qayıdanda istədim ki, xatirə üçün Şəhidimizin məzarının şəklini çəkim. 2 nəfər mənə yaxınlaşıb dedi ki: 'olmaz, bizə tapşırılıb ki, Şəhid məzarının şəkli çəkilməsin'. Mən onlara məhəl qoymayıb Şəhidin əklillə olan şəklini çəkib, qayıtdım.
Mən bizim bəzi bu yerli icra orqanlarına belə bir sual vermək istəyirəm. Bəyəm bizim Möhtərəm Prezidentimiz sizə bunu tövsiyyə edib? Şəhidlərimizin dəfn mərasimlərinə məhdudiyyətlər qoyursuz, bəziləriniz hətta o xeyir-şər evlərinin açarlarını belə öz cibinizə qoyursuz. Şəhid Atası sizdən xahiş etdikdən sonra dəfn mərasimini keçirməyə icazə verirsiz. 10 dəqiqədən bir də polisləri göndərirsiz ora : 'Çox toplaşmayın, biraz tezləşdirin, telefonu yığışdırın..'
Bu millət daş dövründə yaşamır ki. Sizsiz də bilirlər ki, pandemiya var. Böyüklü-kiçikli hamı indi maska taxır. Bəs siz heç hərbi xidmət nə olduğunu bilməyən o qohum-əqrəbalarınızı dəfn edəndə niyə bu məhdudiyyətləri qoymursuz? Bəlkə, pandemiyanı bəhanə gətirib dövlət fondundan Şəhidlər üçün ayrılan o pulları xarcləməyə ürəyiniz gəlmir? İnanın ki bu Mərd Şəhid Atalarının ona heç ehtiyacı da yoxdur. Heç olmasa imkan verin, bu Xalq öz Şəhidini layiqlə son mənzilə yola salsın.
Hanı bizim o molla dediyimiz din xadimləri, hansılar ki, sizin kimi 'Boss'-ların yas mərasimlərində 40 gün yağlı ehsan aşından yeyib, saatlarla bülbül kimi, maşallah, cəh-cəh də vururlar. Sonra da 2 dənə 100-lüyü qoyursuz bu 'dil pəhlivanı mollanın' cibinə. Bəs niyə onlar gəlib bizim bu Şəhidlərimiz üçün Müqəddəs Quranda yazılan o Şəhid Dualarından 40 gün lazım deyil,40-ca dəqiqə də olsa oxumurlar? Bəyəm bizim bu İgid Oğullar sizin o 'fərarilərdən' əksiy oğullardır? Hamıya aid etmirəm, amma elə 'mollalar'da var ki, Xiyabanda durub, Şəhid Duası oxutduranlardan pul da alırlar. 10-larla dini türk telekanalı var ki, müharibə başlayan gündən bizim Şəhidlərimiz üçün Müqəddəs Qurandan Dualar, Ayələr oxuyurlar.Bizim bəzi kanallara çevirəndə görürsən ki, müğənniləri reklam edirlər.Hanı bəs bizim o din xadimləri? Müharibədən qabaq heç olmasa hərdən-birdən gözə dəyirdilər.İndi hara yoxa çıxıblar? Biz bəyəm müsəlman ölkəsi deyilik?
Hanı bizim Rəhmətlik Çingiz kimi, Seyidağa kimi jurnalist,operatorlarımız? Hanı o dronlardan başqa, əsgərlərimizin şücayətini əks etdirən o kadrlar? Olan kadrları da, sağ olsun bizim İgid Əsgərlərimiz, bir-birinə ilham vermək üçün özləri çəkiblər.Bilirəm, bəziləri deyəcək ki, əşi olacaq da, müharibə hələ təzə qutarıb ki..Yox olmayacaq, çünki Çingiz kimi, Seyidağa kimi sinəsini qabağa verib, bu qızğın döyüşlərdə iştirak edən operatorlar olmayıb. Hələ aramızda elələri də var ki, Çingiz kimi Qəhrəmanlarımızın adına ləkə gətirmək üçün cürbəcür şayiələr də qoşurlar.Amma yaxşı ki, belələri çox azdır. Bugün Möhtərəm Prezidentimiz başda olmaqla, bizim Xalq Çingiz, Seyidağa, Mübariz, Polad, Mehrab, _ , _ , _ kimi Qəhrəmanları ilə, onların məğrur Ataları ilə fəxr edirlər.
Allah Bütün Şəhidlərimizə Rəhmət Eləsin! Bütün yaralı Əsgər və Zabitlərimizə Ulu Tanrıdan şəfa diləyirəm.

Видео Qəhrəman Şəhidimiz Mehrabın əziz xatirəsi канала S. EL