Xüsusi təyinatlı qazi: “Yaralı halda beş saat döyüşdük”

Onu siz də tanıyın! 30 yaşlı döyüşçümüz Elnur Cəfərov Vətən Müharibəsinin iştirakçısıdır: “1990-cı ildə Kürdəmir rayonunun Qarasaqqal kəndində anadan olmuşam. Orta məktəbi doğulduğum kənddə bitirmişəm. 2008-ci ildə Daxili Qoşunların N saylı hərbi hissəsində əsgəri xidmətdə olmuşam. 2009-cu ilin oktyabr ayında tərxis olunmuşam. 3 illik fasilədən sonra Daxili İşlər Nazirliyinin Daxili Qoşunlarının Xüsusi Təyinatlı Qüvvələrinin Xidmətə başlamışam. Sentyabrın 27-də Ali Baş Komandanın əmrinə əsasən döyüşlərə qatıldıq. Birinci döyüşümüz Kəlbəcər istiqamətində oldu, 4 gündən sonra qayıtdıq, Cəbrayıl istiqamətində hərəkətə başladıq. Bir neçə kəndi geri aldıq, düşmən postlarını məhv etdik. Cəbrayılda olan erməni postlarını demək olar ki, darmadağın etdik. Ayın 6-sı saat 5-də yaralandım”.

Elnur yaralandığı anı belə xatırlayır: “6 güllə yarası aldım. Bir də QPM-25 yıxıldığı an daban hissəmə düşdü, partlayaraq baldır hissəmdən bədənimə doldu. Tibbi heyət qanaxmamı durdura bildi. Döyüşçü dostlarımın sayəsində xilas ola bildim. Birinci sağ ayağıma dəydi. “Vuruldum” deyib yerə sərildim. O vəziyyətdə qalxdım, amma ayağım saxlamadı, yenidən yıxıldım. Yenə qalxıb irəliləmək istədim, pusquya düşmüşdük, dərə yatağına tərəf irəliləmək istədik ki, vurulmayaq. Beləcə, yenidən ayağa qalxdım, yenə 3 güllə aldım. Sağ ayağım işləmirdi, PK vurmuşdu, onu, ümumiyyətlə, hiss etmirdim. Sol ayağımda isə 3 güllə yarası olmasına baxmayaraq, hərəkət vardı. Ona görə ürəklənib axsaya-axsaya dərə yatağına enmək istəyəndə belimdən dəydi. Belimdən girən güllə onurğama dəyməsə də, o üzdən girdi bu üzdən çıxdı”.

Yaralı halda düşmən mühasirəsinə düşmək istəməyən qəhrəman döyüşçümüz, beləcə, dərə yatağınadək sürünə-sürünə gəlir: “Ayın 6-sı saat 5-dən axşam saat 10-a kimi tək mən yox, digər döyüşçü yoldaşlarımla birgə yaralı-yaralı mövqeyimizi qoruduq. Atışa-atışa səngərdən çıxdıq. Oradan təxliyə olunmağa belə imkan olmadı. İntensiv atəş açılırdı. Gecə saatlarında xəstəxanaya çatdıq. Həyatımızı bizim qəhrəmanlarımız, yəni həkimlər xilas elədi. Bizi yenidən həyata qaytardılar”.

Hazırda Vətən Müharibəsinin mərd döyüşçüsü Daxili İşlər Nazirliyi Daxili Qoşunlarının Hərbi Hospitalında müalicəsini davam etdirir. Yolunu gözləyən ailəsinə, övladlarına qovuşmaq üçün gün sayır: “İki qızım var, ailəm var. İnşallah, sağalıb övladlarıma qovuşacağım günü gözləyirəm”.

Allah tezliklə arzuna çatdırsın, igid!
Rəsmi facebook səhifəmiz: https://www.facebook.com/tvapaxeber
Rəsmi instagram səhifəmiz: https://www.instagram.com/apatvresmi/
Rəsmi twitter səhifəmiz: https://twitter.com/apatvofficial
#apatv #apaxeber

Видео Xüsusi təyinatlı qazi: “Yaralı halda beş saat döyüşdük” канала APA TV