Əli Əliyevin şərhində ölkə və Amerika gündəmi - ''Canlı debat''

Amerikada baş verən qanlı olaylar, demokratiyanın qara günləri və Azərbaycanın zəngin gündəmi. VİP sədri Əli Əliyevlə ''Canlı debat''da Vaşinqtondakı hadisələri, onun Azərbaycana, regiona təsirləri və ölkəmizin daxili mövzularını müzakirə edirik.

Bizim üçün də maraqlıdır: - 20 yanvardan - hakimiyyət felən Co Baydenə keçəndən sonra da Amerikanın başının daxili məsələlərə qarışması Azərbaycana faydalıdırmı? Ermənipərəst, anti-Türkiyə baxışlı bir prezident, görünən budur ki, hələ ABŞ-ın daxili problemlərinin içərisində çox eşələnəcək. Bu da, Qarabağdakı erməni seperatizmi və işğalçıları üzərində parlaq qələbə qazanmış Azərbaycan üçün, həm də ona hər cür dəstək verən Türkiyəmizə çox faydalıdır. O zamana kimi, Ermənistanda da daxili ziddiyyətlər geriyədönməz xarakter alaraq, xilasolunma möhtaclığını itirər. Bu ssenariyə ümid edəkmi, nəzərə alaqmı?
Bir etirafı da edək Azərbaycan siyasətinə də demokratiyanın ABŞ modelinin təsirləri yüksəkdir. Ölkəmizin müxalifət kəsiminin böyük bir kütləsi Amerika heyranıdır. Vikileaks saytının illər öncə açıqlamaları da göstərdi ki, Bakılı demokratlar ABŞ səfirləri ilə danışmağı, oradan ideya və tapşırıqlar almağı, onlarla bütün plan və düşüncələrini paylaşmağı sevirlər. Bir çox ictimai fəal bu və ya başqa yollarla ABŞ-a, onun xüsusi xidmət qurumlarına bağlı fondlarından maliyyələşir və bu prosesdə xəyanət elementləri görmürlər. Tam əksinə, Azərbaycandakı ABŞ heyranları öz hakimiyyəti ilə - rəsmi Bakı ilə əməkdaşlıq edən ictimai fəalları xain hesab edir və onlara qarşı hər zaman mənəvi terror mühiti yaradırlar. Bu baxımdan, indi ABŞ demokratiyasının bu cür böhrana girməsi, heç şübhəsiz, yalnız Amerikanın daxili mühitinə və xalqına deyil, həm də və əsasən qlobal əhval-ruhiyyəyə təsir göstərəcək. Tramp iqtidara gələndən sonra ABŞ-da və ABŞ adı ilə baş verənlər onsuz da bu modeli zədələmişdi. İndi isə demokratiyanın ABŞ modeli sanki uçulub, xalq və Amerika heyranları onun altında qalıb. İndi kənar dövlətlər ard-arda bəyanatla çıxış edərək, ABŞ hakimiyyət qurumlarını insan haqlarına və demokratik qaydalara əməl etməyə, təmkinli olmağa səsləyirlər. Studiyadakı həmsöhbətim Əli Əliyev bu dəyərləndirmələrlə razısıdırmı, baş verənlərin təhlili barədə əlavə nə deyə bilər?
Bu və digər suallarla Azərbaycan müxalifətinin əsas simalarından biri olan Əli Əliyevə müraciət edirik.

Müzakirələrdə sizlər də iştirak edə bilərsiniz. ....

Видео Əli Əliyevin şərhində ölkə və Amerika gündəmi - ''Canlı debat'' канала TV Musavat