РӮЗҲОИ 16 ВА 17 МАЙ ДАР ДУШАНБЕВУ АТРОФИ ОН ВА ҶАНУБИ ТОҶИКИСТОН ХОКБОРИШ МЕШАВАД

Кумитаи ҳолатҳои фавқулоддаи Тоҷикистон бо такя ба маълумоти ҳавошиносон хабар дод, ки рӯзҳои 16 ва 17 майи соли 2024 марказ ва ҷануби Тоҷикистонро чангу ғубор, ё ба истилоҳи мардум, хокбориш фаро мегирад. Ҳавошиносон ба далели тағйири обу ҳаво ҳавои пурчангуғуборро дар ноҳияҳои ҷанубу маркази вилояти Хатлон, ноҳияҳои тобеи ҷумҳурӣ (водии Ҳисор) ва ҳам дар пойтахт, шаҳри Душанбе пешбинӣ мекунанд.
Ба ин далел, Кумитаи ҳолатҳои фавқулодда аз сокинон хостааст, ки дар ин рӯз ба гирифторони бемориҳои қалб, диққинафас (астма), диабети қанд, фишори баланд (гипертония) аҳамияти вижа диҳанд. Аз сокинон ҳамчунин хоста мешавад, ки хонаҳояшонро бо латтаи тар пок карда, дар сурати зарурат, ниқоби тиббӣ бипӯшанд.
Тағйири обуҳаво дар Тоҷикистон дар пайи чанд рӯзи селу боришоти шадид аст, ки чандин кушта ба ҷо гузошта, даҳҳо хонаву дар, роҳу кӯпрук ва заминҳои киштро вайрон кард ва ба иқтисоди ҷумҳурӣ миллионҳо доллар зарар расонд.

Видео РӮЗҲОИ 16 ВА 17 МАЙ ДАР ДУШАНБЕВУ АТРОФИ ОН ВА ҶАНУБИ ТОҶИКИСТОН ХОКБОРИШ МЕШАВАД канала Bomdod TV