Оштун мэри ишкерлер менен шаарды кыдырып, шаардын абалын биргеликте жакшыртууга чакырды

Ош шаарынын мэри Таалайбек Сарыбашов жеке ишкерлер менен чогуу ишкерлердин колдоосу менен жасалган иштер менен тааныштырып чыкты. “Биз өнүккөн шаар үчүн!” семинарына шаардагы курулуш компанияларынын ээлери, ар кайсы тармакта бизнес жүргүзүп жаткан жүзгө жакын ишкерлер катышты.
Шаар мэри ишкерлерди шаардын абалын биргеликте жакшыртууга чакырды.
“Ош шаарында жеке ишкерлер менен жергиликтүү бийлик биргеликте иш алып баруу жаатында алгылыктуу иштер жасалууда. Бир канча иштер жасалды. Биз негизги иштерди жергиликтүү бюджеттин эсебинен жасап жатабыз. Ошентсе да шаар үчүн ишкерлердин колдоосу керек. Албетте өз каалооңуздар менен. Ар бир ишкер өзүнүнүн ишканасынын алдын оңдоп, маңдайындагы тротуарды оңдоп койгондугу да чоң жардам. Эң негизгиси шаардын абалына кайдыгер карабашыбыз керек. “Мамлекеттик-жеке өнөктөштүк” мыйзамынын алкагында да көп иштерди жасашыбыз керек. Ишкерлер ишин мыйзамдуу кылса, эч ким тоскоолдук жаратпаш керек. Укук коргоо органдари ишкерлердин укугун коргошу зарыл”,-деди мэр.
Алгач ишкерлер жаңыдан реконструкциядан өткөн Токтогул Сатылганов паркы менен таанышып чыгышты. Аталган паркка жергиликтүү бюджеттин эсебинен 32 млн сомдон ашык каражат жана жеке ишкерлер менен эл аралык уюмдар тарабынан 3,5 млн сомдук каражат сарпталган. Андан кийин оңдоодон өткөн А. Сүйүмбаев стадионуна барышып, аткарылган иштерди көрүп чыгышты. Стадионду оңдоого жеке ишкерлер тарабынан 10 млн сомдун айланасындагы каражат сарпталган.
Аткарылган иштер менен таанышуу Кулатов кичи шаарчасындагы Б. Осмонов көчөсүнүн чыгыш тарабына “Нурзаман” курулуш компаниясы тарабынан курулган эс алуу жайында уланып, курулуш компаниянын өкүлдөрү курулуш иштерине жалпы 3,2 млн сом жумшалганын билдиришти.
Соңунда жогорку окуу жайдын жыйындар залында мэр ишкерлердин суроолоруна жооп берип, резолюция кабыл алынды.
Семинар 2019-жыл-Региондорду өнүктүрүү жана өлкөнү санариптештирүү жылынын алкагында өттү.

Видео Оштун мэри ишкерлер менен шаарды кыдырып, шаардын абалын биргеликте жакшыртууга чакырды канала Osh Meriya