Алматыда «Қайсар» телесериалының түсірілімі басталды

Алматыда «Қайсар» телесериалының түсірілімі басталды. Қазақстан Қарулы Күштерінің құрылғанына 30 жыл толуына орай бұл сериал 31 арна эфирінен көрерменге жол тартады. Авторлар телетуынды әскери өмір мен оның қыр-сырын, сондай-ақ жанрдың бірнеше түрін қамтитынын айтты. Кеңес Одағы ыдырағаннан кейінгі ел армиясындағы жағдайды бейнелейтін телесериал жас ұрпақты отансүйгіштікке баулиды.
Бұл жолы киногерлердің дәстүріне айналған табақ сындыру рәсімі болмады. Мұның қазақылыққа жат екенін айтқан режиссер одан да өз үрдісімізді қалыптастырғанымыз жөн дейді. Алматыда түсірілімі басталған әскери драманың мақсаты - Қазақстан армиясы әскери қызметкерлерінің беделін арттыру, өскелең ұрпақты отансүйгіштікке тәрбиелеу. Сериалдың режиссері әрі продюсері Азамат Ержанұлының айтуынша, әскери драма дегенмен мұнда барлық жанрдың синтезі көрініс табады.
АЗАМАТ ЕРЖАНҰЛЫ, режиссер:
– Махаббат та бар, драма да бар, мелодрама, трагедия да бар. Сатқындық пен достық көріністері бар, оған қоса қызықты оқиғаларға куә боласыздар. Арасында комедия да тамашалайсыздар.
Сериалдың желісі бойынша басты кейіпкер Қайсар Тәуелсіздік таңы атқанда, әскери құрылым толық құлдырап жатқан кезеңінде Қарулы күштер қатарына шақырылады. Қарапайым сарбаз әскердегі әлімжеттік, сыбайлас жемқорлыққа тап болады. Осы сәтте көрермендер оның жауынгерлік жігерінің қаншалықты төзімді екенін, қызметтің қиындығына шыдас беруге көмектесетін жоғары адамгершілік қасиеттерін көре алады деген Жақсылық Тұрлығазы өз әсерімен бөлісті.
ЖАҚСЫЛЫҚ ТҰРЛЫҒАЗЫ, актер:
– Әскери адамның рөлін бірінші рет сомдап тұрмын. Әскери адамдардың өмірі өте қиын екен. Қазір бастан өткеріп, сезініп жатырмыз. Жарғылары мен тәртіптерін, жұмыс режимдері үлкен кедергі, үйрену де қиын.
Сериал сценаристерінің сөзінше, телетуындының көрерменге берері мол. Айтуынша, әскери өмірді егжей-тегжейлі көрсету арқылы жастарды, өскелең ұрпаққа батырлық пен батылдық, жанкештілікке баулу. Биыл тамыз айында 31 арнадан қалың көрерменге жол тартатын телесериал 20 сериядан тұрады деп жоспарланған.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Алматыда «Қайсар» телесериалының түсірілімі басталды канала Информбюро 31