Fakt va Fikr (28): Özbekiston Saylov Kodeksidagi hiylalar haqida

Ҳеч ўйлаб кўрганмисиз, нега биз 30 йилдан бери парламентда ва ҳукуматда бизнинг манфаатларимизни ҳимоя қиладиган, ўзимиз истаган депутат ҳамда президентни сайлай олмаяпмиз?

Кўпчилик: “Энди Каримовнинг диктатураси бунга йўл қўймаган-да! Ҳозир ҳам бунга ҳукумат айбдор” – дейди. Албатта, бу тўғри жавоб, асосли фикр.

Лекин 30 йилдан бери тепадан тиқиштирилган номзодларни мажбуран сайлаб юрганимизга қонунлар ҳам сабабчи. Ўзбек халқини ўзи истаган одамларни сайлай олмайдиган мақомга туширишда, хусусан, Ўзбекистон Республикаси Сайлов Кодексининг ҳам улуши бор.

Азизлар!

Агар сизга кимдир: “Мен ислоҳотчиман! Адолат тарафдориман!” – деб келса, унга: “Ислоҳот ва адолат учун қайси адолатсиз қонунларни йўқ қилдингу, ўрнига қандай адолатли қонунларни қабул қилдинг?” – деб сўранг.

Агар у саволингизга жавоб бера олмаса, уни ҳайдаб солинг! Чунки у ислоҳотчи ва адолатчи ниқобидаги ёлғончидир. Бундай ёлғончиларнинг ўрнига ҳақиқий сиёсий лидер ва ислоҳотчини сайлаш керак.

Сайловли сиёсий тизимнинг шуни-си яхши-ки, сен сайлаган депутат ёки президент сайланиб олгач, ўз ваъдаларини бажармаса, кейинги сайловларда уларнинг ўрнига халқни алдамайдиган, ўз ваъдасидан чиқадиган бошқа одамларни сайлаш мумкин.

Лекин сайловчилар ўз ҳақ-ҳуқуқларини билишмаса, сайловчилар ўзлари истамаган одамларни, тепадан тиқиштирилган номзодларни сайлаб юришга мажбур бўладилар. Сайловчиларнинг ҳуқуқий ва сиёсий саводсизлиги ҳар қандай ёлғончи ҳукумат учун айни муддао ва жоннинг оромидир.

Бундай ҳукуматлар сайловчиларнинг ҳуқуқий ва сиёсий саводсизлигидан фойдаланиб, қайта ва қайта сайланаверадилар. Сайловчилар исташмаса ҳам, сайланаверадилар.

“Факт ва Фикр”нинг жума, 30 апрель куни “Ютюб”га қўйиладиган кейинги, 29-чи сонида “Нега ҳукумат қонунларни билмаслигимизни истайди?” деган саволга батафсил жавоб излаймиз.

Иншааллоҳ, навбатдаги кўрсатувда “Ҳақиқат ва тараққиёт” партиясининг ҳукумат томонидан сазойи қилинаётган тарафдор ва аъзоларига баъзи ҳуқуқий маслаҳатлар ҳам бераман.

Ҳозирча эса фактларни ўрганинг ва фикр қилинг!

Бобомурод Абдулла

2021 йил 28 апрель

Видео Fakt va Fikr (28): Özbekiston Saylov Kodeksidagi hiylalar haqida канала Fakt va Fikr