Карантиннің кесірі: қызылордалық бір топ тұрғын түрмедегі жақындарымен кездесуді талап етеді

Қызылордада тұрғындар 169/5 мекемесінде жазасын өтеп жатқан жақындарымен кездестіруді талап етеді. Көпшілігі карантиннің кесірінен бір жылға жуық уақыттан бері сотталған туыстарымен жолыға алмай жүр. Ең сұмдығы ұзақ мерзімді кездесу ұйымдастырмады деп түрмеде отырғандардың арасында өз тамырын кесіп наразылық білдіргендер бар көрінеді. Бүгін сотталушылардың бірінің анасы, бірінің жұбайы ашынып жауапты департаменттің алдына жиналды.
Жазасын өтеп жатқан жақынымызбен жолыға алмай жүрміз деген бір топ тұрғынға бүгін департамент басшысымен жолығу да мұң болды. Қатты аязда дірдектеген жандарды бастапқыда мекеме қызметкерлері ғимаратқа кіргізбей далада ұзақ ұстады.
Карантин басталғалы сотталғандармен қауыша алмаған туыстары түрме басшылары кездесуге рұқсат сұрасақ алдымен ПТР тесттің қорытындысын сұрайды дейді. Ал тест қорытындысын апарғанның өзінде әр нәрсені сылтауратып ішке кіргізбейтіндерін айтады.
АҚБОТА ПЕРНЕБАЕВА, жазасын өтеушінің жұбайы:
– Екі қабат келіншек тапсырып келді поликлиникадан. Оны жарамайды деп кіргізбей жіберді. Бізде қаншама аналар бар, балалар бар. Соған ұзақ мерзімдегі свиданкаға кіріп, ас-суын беріп, бауырымызға қысып екі күн қасында болғанымызды қалаймыз.
Жазасын өтеушілермен тіпті скайппен сөйлесуге де интернет нашар деп мүмкіндік бермей отырғанын айтады тұрғындар. Ал Нұргүл Азенова кездесуге рұқсат берілмегендіктен түрмеде отырған төрт баламның әкесі өз тамырын кескіледі деп жыларман күйде. Мұндай жайсыз хабарды басқа біреу арқылы естіген ол енді жолдасым қазір аман ба, жоқ па оны да білмей отырмын дейді.
Департамент басшысы карантин уақытында тек Қызылордада емес, республика бойынша қылмыскерлердің жазасын өтеу мекемелерінде ұзақ мерзімдік кездесулерге тыйым салынды дейді. Ал кездесу ұйымдастырылмағаны үшін сотталғандардың өзіне дене жарақатын салу жағдайлары болмағанын айтады.
ШАЙМЕРДЕН ЕСЕНГЕЛДИЕВ, Қызылорда облыстық қылмыстық атқару жүйесі департаментінің бастығы:
– Сотталған азаматтардың өтініші бойынша таксофон арқылы 15 минутқа дейін сөйлесуге мүмкіндік беріліп жатыр. Республикада эпидемиялық жағдай тұрақталса, ұзақ мерзімді кездесу беріледі.
Басшы сотталғандарды туыстарымен жолықтыру үшін барлық жағдайды жасауға тырысамыз дейді. Ал карантиннің кесірінен хат-хабарсыз қалған жандар абақтының арғы жағындағы жақынының жайын біліп, бет-жүзін көруге асығып жүр.

Абай Нұржанұлы, Рахымжан Ысқақов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #басты_жаңалықтар

Видео Карантиннің кесірі: қызылордалық бір топ тұрғын түрмедегі жақындарымен кездесуді талап етеді канала Информбюро 31