"Абу Сахий"нинг янги эгаси ëнғин бахона тужжорларни дўконидан айирмоқчи

Собиқ “Абу Сахий” бозоридаги дўконлари бузилишидан норози тадбиркорлар ғалаёни ортидан бозорнинг янги эгаси - “Tashkent Trade Center” ҳусусий корхонаси 27 январь куни ўзининг телеграм каналида воқеага изоҳ берди.

“Tashkent Trade Center” изоҳига кўра, бозорнинг 1-блогида Республика Фавқулодда вазиятлар бошқармаси (ФВВ) ва Тошкент шаҳар Ёнғин хавфсизлиги Бошқармаси (ЁҲББ)нинг «ёнғинга қарши камчиликларни бартараф қилиш ҳақидаги ҳулосаси» асосида реконструкция ишлари амалга оширилиши режалаштирилган.

Реконструкция, яъни бозорнинг 1-блокидаги “контейнер дўконлар” ўрнига янги дўконлар қуриш режаси амалга ошгунга қадар дўкондорлар иш фаолиятини вақтинча тўхтатишлари ҳақида расман огоҳлантирилган.

Шунингдек, “Tashkent Trade Center” хусусий корхонаси дўкон эгаларига вақтинчалик фойдаланиш учун, 2019 йилнинг декабрида қуриб битказилган савдо мажмуасининг ертўла қисмидан вақтинчалик жой беришни таклиф қилган.

«Элтуз»га келиб тушган, бозордаги ғалаён акс этган видеода айни талаб ва таклифлар дўкондорларни ғазабга келтирганини кўриш мумкин.

«Вазирлар Маҳкамасининг 16 ноябрдан кучга кирган қарори бор. Шу асосда тадбиркорнинг талаби устивор бўлиши керак. Подвалдан эмас, мулк эгаси хоҳлаган жойдан берилиши керак жой. Биринчи қаватни ҳоҳлаяпсизларми, биринчи қаватдан беришлари керак. Агар рози бўлмасаларинг келишув имзоси қўйилиши керак эмас», дейди видеода ўзини мулк эгаларидан бири дея таништирган эркак.

Ўтган 2018 йилнинг 16 ноябрида Чилонзор тумани ҳокимлиги вакилларининг тадбиркорлар билан учрашувида ҳам айни норозилик билдирилгани ҳақида Элтуз мақола чоп қилган эди.

Исмини айтмаган, “Элтуз” суҳбатлашган дўкон эгаларидан бўлган бир аёлнинг айтишича, кўпчилик дўкондорлар мулки олиб қўйилиши ҳақида оғзаки огоҳлантирилган.

Бунинг сабабини дўкон инфратузилмасини ўзгартириш мақсадида бузилиши билан изоҳлашган. Бироқ тортиб олинадиган дўкон ўрнига на муносиб товон пули, ёки янги дўконлардан бирини бериш ҳақида гап кетмаяпти.

“Менинг дўконим 16 квадрат метр майдонда жойлашган. Дўконнинг мулк кадастр ҳужжатлари 2012 йилнинг апрелида номимга расмийлаштирилган. Дўконнинг бугунги кундаги нархи 100 минг долларга яқин бўлади. Лекин гап товон пули ҳақида ёки бозор ўрнида қуриладиган янги дўконларнинг бизга берилиши ҳақида кетмаяпти”, – дейди савдогар аёл.

Норозилар, инвестор билан учрашишни. Мулк эгалиги қонуний ҳужжатлаштирилишини, Бозор маъмурияти, мулк эгаси ва инвестор ўртасида, манфаатлар акс этган уч томонлама шартнома тузиш талабларини илгари суришмоқда.

Тошкентдаги “Абу-Сахий” бозори ва шу номдаги карго ширкатининг Ўзбекистон биринчи президенти Ислом Каримовнинг куëви Тимур Тиллаевга тегишли бўлгани айтилади.

Видео "Абу Сахий"нинг янги эгаси ëнғин бахона тужжорларни дўконидан айирмоқчи канала El Tuz