Әкім салтанатты түрде берген 40 медициналық көлік, қақаған аязда қаңтарылып құр тұр

Біздің әкімдер бітпей қалған нысандардың, аяқталмаған жобалардың лентасын қиып, көзбояушылық үшін салтанатты рәсім жасауды қашан доғарады? Қызылорда облысының әкімі Гүлшара Әбдіқалықованың осыдан бір ай бұрын жарнамасын жер жарғызып берген бірнеше жедел жәрдем көліктері әлі күнге тұрғындар игілігіне жарамай тұр. Оның үстіне 40 автокөлік қазіргі қақаған суықта қар астында қаңтарылып қалған.
ГҮЛШАРА ӘБДІҚАЛЫҚОВА, Қызылорда облысының әкімі:
– Қазіргі таңда толығымен жабдықталған 40 жаңа көлік лизинг арқылы және екі дана жылжымалы медициналық кешен жеткізілсе, «Аралтұз» АҚ-ның демеушілігімен екі автомобиль алынды. Бүгінгі шараны сіздерге толық жағдай жасау іс-шарасы деп білеміз.
Бір ай бұрынғы осы шарадан кейін облыстағы жедел жәрдем көліктері бірден 96 пайызға жаңаруы тиіс еді. Сол үшін облыс әкімі Гүлшара Әбдіқалықова жедел жәрдем қызметкерлерін орталық алаңға жинап салтанатты рәсім ұйымдастырды. Жергілікті бюджеттің 800 миллион теңгесіне алынған жаңа көліктердің кілтін өз қолымен табыстаған болатын. Алайда әкім «толық жағдай жасап жатырмыз» дегенді уақытынан ерте айтып қойғандай. Өйткені сол кезде кілті берілген жедел жәрдемнің 40 көлігі қазір ақ қырау қатып автотұрақта қаңтарылып тұр.
Осы кезге дейін суықта қалған техникалардың аккумуляторы отырып, бірден оталар емес. Ал жедел жәрдем станциясының басшысы бір ай бұрын табысталған көліктердің құжаттары енді ғана рәсімделіп жатқанын айтады.
АЛМАТ ҚҰРМАНҒАЛИ, Қызылорда облыстық жедел жәрдем станциясының бас дәрігері
– Құжаттандырылғаннан кейін тапсыруға болатын еді. Қалайда автокөліктер тұрады енді. Бір ай көлемінде ол тұру керек. Себебі келісім шарт бойынша ол құжатты рәсімдеу процесі жүреді.
Бұл көліктер коронавирустың екінші толқыны келе қалған жағдайға деп алынған екен. Енді жаңа көліктер тұрғындарға тез жетпесе, жаздағыдай облыс дәрігерлері науқастың жағдайын білуге велосипед мініп жүруі мүмкін. Дегенмен, бас дәрігер жедел жәрдемдер бүгін-ертең жолға шығатынын айтады.
Абай Нұржанұлы, Рахымжан Ысқақов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Әкім салтанатты түрде берген 40 медициналық көлік, қақаған аязда қаңтарылып құр тұр канала Информбюро 31