Алакөлде үрмелі матрацта демалып жатқан туристі 27 жастағы бойжеткен гидроциклмен қағып кетті

Алакөлдің жағасында үрмелі су матрацында демалып жатқан туристі 27 жастағы бойжеткен гидроциклмен қағып кетті. Салдарынан 40 жастағы азамат оқиға орнында көз жұмды. Ал оның қасындағы қызының иығы сынып, Үржар ауданындағы ауруханаға жеткізілді. Бейресми ақпарат бойынша, марқұм Семей қаласында жұмыс істеген полиция қызметкері болған. Жалпы еліміздегі демалыс орындарында судағы қауіпсіздік ережелері неге сақталмайды? Адамдар суға түсетін аймақта гидроциклердердің жүруіне неге тыйым салынбайды?
Демалыс орнында болған апаттан соң, аман қалған қыз бала Үржар ауданы Мақаншы ауылындағы ауруханаға жеткізілген. Алғашында жан сақтау бөліміне жатқызылған. Қазір оны анасы Семей қаласындағы ауруханалардың біріне алып кеткен екен. Бейресми ақпарат бойынша қайтыс болған оның әкесі полиция қызметкері. Ал үрмелі матраста дем алып жатқан әкесі мен баласын гидроциклмен басып кеткен әйел Түркістан облысының жиырма жеті жастағы тұрғыны. Одан ешқайда кетпеу туралы қол хат алынған. Гидроциклдің иесіне Қылмыстық Кодекстің 306-бабы 3-бөлігі бойынша іс қозғалды.
БАУЫРЖАН ОМАРОВ, Үржар ауданы полиция бөлімі бастығының орынбасары:
– Абайсызда адам өліміне әкеп соққан қауіпсіздік талаптарына жауап бермейтін қызметтер көрсету бойынша сотқа дейінгі тергеу басталды. Қазіргі уақытта іс бойынша бірқатар сараптамалар тағайындалды, қажетті тергеу әрекеттері жүргізілуде.
Жалпы еліміздегі демалыс орындарындағы судағы қауіпсіздік ережелері сақталмайтынын демалушылардың өздері айтып, алаңдап отыр.
Суда жүзетін көліктің қай түрі болса да оны жүргізу үшін арнайы білім алу қажет. Оқуды аяқтаған соң емтихан тапсырып, рұқсат алады. Бірақ барлық жерде олай емес. Қазіргі қайғылы жағдай соны тағы бір мәрте дәлелдеп берді.
СӘБИТЖАН КӨШЕКБАЙ, Маңғыстау облысы көлік бақылау инспекциясының су көлігіндегі бақылау бөлімінің бас маманы:
– Шағын кемелерді, гидроциклдерді, катерлерді сатып алған күннен бастап 30 күн ішінде Egov порталы арқылы тіркеуге өтініш беріледі. Су көлігін, шағын көлемді кемелерді көліктік инспекция мамандары бақылайды. Гидроциклдерді айдайтын адамдарда жүргізу куәлігі болуы тиіс. Адамдардың суда түсіп жүрген аймақтарда гидроциклдер жүргізуге қатаң тыйым салынады.
Заңда жазылған осы талаптар осыған дейін толық орындалмаған Алакөлде кешегі қайғылы жағдайдан кейін тергеуге байланысты тексеру басталды. Демалушылар мен демалыс орынының иелері қауіпсіздік ережелерін алдағы уақытта қаншалықты сақтайтынын тағы белгісіз.
Жанболат Санияз
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Алакөл #оқыс_оқиға #туризм #демалыс

Видео Алакөлде үрмелі матрацта демалып жатқан туристі 27 жастағы бойжеткен гидроциклмен қағып кетті канала Информбюро 31