Қытайда сотталған екі ҚР азаматшасы бүгін Алматыға жеткізілді

Есірткі контрабандасы үшін Қытайда сотталған біздің елдің екі азаматшасы бүгін Бейжің қаласынан Алматыға жеткізілді. Олар аспан асты елінде өмірбойына бас бостандығынан айырылған.

Енді сотталушылар 15 жылын еліміздің түзеу мекемелерінде өткізеді.

Ұзақ уақыт Қытай түрмесінде болған Оңтүстік Қазақстан облысының тұрғындары Жарадат Омарова мен Виктория Зеленкина осыдан 6 жыл бұрын дәл осы Алматы әуежайынан Үндістан мен Бангладеш арқылы үлкен көлемдегі есірткіні алып, аспанасты еліне жол тартқан. Олардың айтуынша, есірткіні табыстаған Өзбекстан азаматы діттеген жерге жеткізгендері үшін 2 мың АҚШ долларын төлеймін деп уәде берген.

Алайда жасыл қағаздың орнына аңқау әйелдер өмірлік жазаны мойындарына іліп кете барған.

Бейжің әуежайында қолға түскен оларға 7 айдан кейін сот болады. Журналистердің сұрақтарына жауап берген Виктория Зеленкина тағдырына қол ұшын созған жандарға алғыс айтып, көзіне жас алды.

Виктория Зеленкина, ҚХР есірткі контрабандасы үшін сотталушы

-Ең бірінші мен Президентіміз Нұрсұлтан Әбішұлына рахмет айтамын. Алғысым шексіз. Сондай-ақ елге оралуымыз үшін көп күш салған елшілерге рахмет.

Елшілер мен бас прокуратураның өкілдерінің еңбегі ерен расында. Қытайда есірткі контрабандасы қатаң жаза кесілетін ең ауыр қылмыс түрі болып саналады. Отандастарымызды елге қайтару үшін 6 жыл уақыт кеткен.

Әлжан Нұрбеков, ҚР Бас прокуратурасы халықаралық әріптестік департаменті басшысының орынбасары

-Бұл бірінші кезекте еліміздің Сыртқы істер министрлігі, елшіліктің еңбегі. Олар шетелдегі Қазақстан заматтарының құқықтарын қорғау мақсатында үлкен жұмыстар жасап жүр. Біздің сот Қытай сотының үкімін тану және орындау туралы қаулы шығарғаннан кейін Қытай тарапы біздің елдің 6 азаматын қайтаруға келісім берді. 4 азамат наурыз айында елге оралды.

Қазіргі уақытта Қытайда Қазақстанның 10 азаматы жазасын өтеуде. Тағы 13 адамның ісі тергеуде жатыр. Олардың көбі есірткі мен сирек кездесетін жәндіктер контрабандасы үшін ұсталғандар.

Біздің елшілер оларды Қазақстанға әкелу үшін Қытай тарапымен келіссөздер жүргізіп жатыр.

Авторлары: Гүлжан Көленқызы, Асқар Серғалиев, Айдар Әбдешов

Видео Қытайда сотталған екі ҚР азаматшасы бүгін Алматыға жеткізілді канала novosti khabar2016