Кенесары хан мен Кейкі батырдың бас сүйектері елімізге қайтарылуы мүмкін

Сүйінші хабарымыз бар. Алдағы уақытта Кенесары хан мен Кейкі батырдың бас сүйектері елімізге қайтарылуы мүмкін.

Үкімет басшысы Кәрім Мәсімов Сочи қаласында Ресей Премьер-Министрі Дмитрий Медведевпен екіжақты кездесу өткізіп, осы мәселені көтерді.

Қазақ елі үшін аса маңызды тарихи тұлғаларды елге әкеліп жерлеу көпшіліктің сұрауы екенін айтқан Үкімет басшысы бұл мәселені шешуді сұрады.

Кәрім Мәсімов ҚР Премьер-Министрі

-Бізде бір маңызды мәселе бар. Біздің ұлт-азаттық қозғалыстың көшбасшыларының бас сүйектерін елге қайтару мәселесін шешіп беруіңізді сұраймын. Олар Ресей Ғылым академиясының Петр Біріншінің атындағы Антропология және этнография мұражайында жатыр. Мүмкіндік болса, Қазақстанға қайтарып, еліміздің топырағына жерлесек деген ниетіміз бар. Бұл қазақ халқы үшін өте маңызды.

Дмитрий Медведев, РФ Премьер-Министрі

-Еш күмәніңіз болмасын. Мен ауызша және егер қажет болса, жазбаша тапсырма беріп, бұл мәселенің анық-қанығын анықтаймын.

Содан соң Премьер-Министр Кәрім Мәсімов Сочи қаласында Еуразиялық Үкіметаралық кеңестің отырысына да қатысты.

Жиында Қазақстан, Ресей, Белоруссия, Армения және Қырғыз елінің Үкімет басшылары экономикалық интеграцияның маңызды мәселелерін талқылап жатыр.

Кеңес барысында Еуразиялық экономикалық одақ елдерінің Кеден кодексін қабылдаудың соңғы мерзімі туралы шешім қабылдануы тиіс.

Видео Кенесары хан мен Кейкі батырдың бас сүйектері елімізге қайтарылуы мүмкін канала novosti khabar2016