Елімізде мұғалімдердің жалақысы көтерілуі мүмкін

Бұл туралы Мәжілісте өткен Үкімет сағатында Білім және ғылым министрі хабарлады. Ерлан Сағадиев ол үшін жылына 88 млрд теңге қажет дейді. Мәселе қазір Қаржы министрлігінде қаралып жатқан көрінеді.

Бүгінде қазақ балаларының 90 пайызы ана тілімізде білім алуда. Алайда баба тілін білмейтін балалар да бар. Білім және ғылым министрі Үкімет сағатында ең алдымен осы мәселеге депутаттардың назарын аудартты.

Ерлан Сағадиев, ҚР Білім және ғылым министрі:

-Орыс мектептерінде оқитын 500 мыңға жуық бала қазақша сөйлемейді. Сол мектептерге арналған жаңа ғылыми негізінде жасалынған деңгейлік коммуникативтік әдістеме дайын. Осы оқу жылынан бастап, пилот ретінде жеке мектептерге енгізе бастаймыз.

Жиында мардымсыз мөлшердегі мұғалімдер жалақысы да талқыланды.

Ерлан Сағадиев, ҚР Білім және ғылым министрі:

-Мұғалімдердің жалақысын өсіру үшін жылына 88 миллиард теңге қажет. Бұл сома жөнінде Қаржы министрлігін құлағдар еттік, тиісті есептік құжаттарды тапсырдық. Келер жылы олар аталған мәселені қарастырады.

Бүгінде ата-аналар мен педагогтардың қарауына тасталған бір жауапты мәселе бар. Ол үй тапсырмасын азайтуға байланысты әрі демалыс күндеріне мүлде тапсырма бермеу жайы. Оған қатысты шешім алдағы уақытта айтылады. Депутаттар бұдан бөлек, электронды күнделікке қатысты да сауал жолдады.

Нұртай Сабильянов, ҚР Парламенті Мәжілісінің депутаты:

-Интернет арқылы толтырамыз, қағазбен күнделікті де толтырамыз. Осының қажеті қаншалықты? Неге ата-аналарды осыған мәжбүрлейміз?

Ерлан Сағадиев, ҚР Білім және ғылым министрі:

-Күнделік мұғалімдерге арналған. Оны күнделікті толтыру жұмыстары керек болмаса ешкім мәжбүрлей алмайды. Ол міндетті емес.

Талай ұрпаққа әріп үйретіп, талай ғалымға тәлім берген «Әліппені» қайтару керек. Депутаттар осылай деп, бірінші сыныптағы «Сауат ашуд» пәніне қарсылық білдірді.

Әбдіманап Бектұрғанов, ҚР Парламенті Мәжілісінің депутаты:

-Менің жеке ойым, «Сауат ашудың» орнына «Әліппе» болғаны дұрыс.

Депутат Бектұрғановтың ойындағысын әріптесі Бекболат Тілеухан министрге төтесінен айтты. Сұрақ түрінде емес, талап сипатында.

Бекболат Тілеухан, ҚР Парламенті Мәжілісінің депутаты:

-«Әліппе» деген сөз – символдық, бейнелі, ментальді атау. Ол – Ахмет Байтұрсыновтардан келе жатқан, сенің қаныңа сіңісті болған атау. Зиялы қауымның талабы «Сауат ашуды» құртыңыз да, «Әліппені» бізге қайтарып беріңіз.

Ерлан Сағадиев, ҚР Білім және ғылым министрі:

- Жыл сайын 300-ден астам оқулықтарды дайындап отырмыз. 5 мыңнан астам мұғалім қатысып отыр. Енді сол оқулық дайын болғанда сайтқа шығарып, елге көрсетеміз. Ол сайтта 6 ай болды тұр. Сонда қарамайсыңдар ма?

Әйтеуір «Әліппе» қайтып келетін болды. Үкімет сағаты аяқталысымен, асыққан министрден біз осындай жауап алып үлгердік.

Ерлан Сағадиев, ҚР Білім және ғылым министрі:

-Мектепке дейінгі балаларға арналған «Әліппе» болады, сосын бірінші сыныпта «Ана тіліге» көшеді. Ол түсінікті ма? Оны 2019 жылдан бастаймыз, бірақ пилот ретінде биыл оқытылады.

Авторлары: Достық Талғатұлы, Арман Данышбаев

Видео Елімізде мұғалімдердің жалақысы көтерілуі мүмкін канала Хабар TANYM