КИМ КУРОНДАГИ 19-ТА ФАРИШТАДАН НАЖОТ ИСТАСА УШБУ ОЯТНИ ХАР ДОИМ АЙТИБ ЮРСИН ОЯТ 19ТА ХАРФДАН ИБОРАТ

Бисмиллаҳир роҳманир роҳийм#МУДАССИР_СУРАСИ 30 оят Расулуллоҳ соллаллоҳу алайҳи васаллам шундай дедилар: “Менга шундай бир оят нозил бўлди, у Сулаймон алайҳиссаломдан бошқа бирор пайғамбарга нозил қилинмаган. У оят “Бисмиллаҳир роҳманир роҳийм”дир”.

Ҳазрати Жобир розияллоҳу анҳу айтадилар: Бисмиллаҳир роҳманир роҳийм нозил бўлганда олтита иш содир бўлди:

1. Булутлар машриқ томонга силжиб турди.
2. Шамоллар эсишдан тўхтаб турди.
3. Денгизлар тўлқинланишдан тўхтаб турди.
4. Бутун жониворлар унга қулоқ тутиб турди.
5. Осмондан катта олов тушиб, шайтонларни куйдирди.
6. Аллоҳ таоло Ўзининг иззати ва буюклигига қасам ичиб айтдики: Қайси нарса устида, менинг бу номим зикр қилинса, албатта унда барака бўлади.

Абдуллоҳ ибн Масъуд розияллоҳу анҳу: “Ким жаҳаннамдаги ўн тўққизта азоб фариштасидан омонлик истаса, “Бисмиллаҳир роҳманир роҳийм” ни кўп ўқисин. Ушбу калимада ҳам ўн тўққизта ҳарф бўлиб, ҳар бир ҳарф қиёмат кунида биттадан фариштадан омонлик бўлиб келади” деганлар.
Ибн Атийя ривоят қилган.

Буни бошқа ҳадиси шариф ҳам таъкидлаб келади: Пайғамбаримиз соллаллоҳу алайҳи васаллам: “Мен ўттиздан кўпроқ фаришталарни шошиб (ер юзига тушиб) келаётганини кўрдим” дедилар.

Пайғамбар соллаллоҳу алайҳи васаллам буни бир киши:
“رَبَّنَا وَلَكَ الْحَمْدُ حَمْدًا كَثِيرًا طَيِّبًا مُبَارَكًا فِيهِ ни ўқиган пайтда айтган эдилар. Бу калималарда ҳам ўттиздан кўпроқ ҳарф бор, ҳар бир ҳарф эвазига биттадан фаришта тушган. Айни шу тарзда “Бисмиллаҳир роҳманир роҳийм”да ҳам ўн тўққизта ҳарф бор, дўзаҳдаги азоб фаришталар адади ҳам ўн тўққизтадир.

Имом Аҳмад раҳматуллоҳи алайҳ муснадларида келади: Бир саҳобий Пайғамбар соллаллоҳу алайҳи васалламнинг уловларида мингашиб олган эдилар.У Киши айтадилар: Набий соллаллоҳу алайҳи васалламнинг биялари бир оз қоқилиб кетди. Шунда, мен: Ҳа, Шайтонга хор бўлгур! дедим. Набий соллаллоҳу алайҳи васаллам: “Ундоқ дема, бу гапингдан шайтон ғурурланади ва буни мен ўз кучим ила қилдим деб ўйлаб қолади. Ундан кўра “Бисмиллаҳир роҳманир роҳийм” дегин. Ҳа, Бисмиллаҳ дейиш сабабли шайтон пашша каби паст ва хор бўлади” дедилар.

Ҳар бир мақбул иш ёки сўзни “Бисмиллаҳир роҳманир роҳийм” билан бошлашлик, мусулмонни мусулмон эканини кўрсатиб турадиган исломий белгилардандир. Пайғамбар соллаллоҳу алайҳи васаллам: “Ҳар бир аҳамиятли иш “Бисмиллаҳир роҳманир роҳийм” билан бошланмас экан, унинг охири кесикдир” деганлар.

Яна бошқа бир ҳадис шарифда: “Қайси иш “Бисмиллаҳир роҳманир роҳийм” билан бошланмас экан, у ишда барака бўлмайди” деганлар.

Пайғамбар соллаллоҳу алайҳи васалламнинг суннатлари шуки, ҳар бир муҳим ишни “бисмиллаҳ” билан бошлар эдилар. Ҳар бир мусулмон бу суннатга эргашиб, бисмиллаҳ билан иш бошлашликни одат қилиб олсин.

Уйга кирганда, уйдан чиқганда, уловга минганда, уловдан тушганда, улови ёки ўзи қоқилиб кетганда ҳам, масжидга кирганда, масжиддан чиқганда “Бисмиллаҳ” десин. Овқатдан олдин, бирор нарса ичишдан олдин, кийим кийганда, оёқ кийим кийганда ҳам, бирор китоб ўқиганда ёки бирор нарса ёзганда, уй рўзғор ишларига киришганда, бирор янги иш бошлаганда “Бисмиллаҳ” десин.

Шунингдек аёллар ҳам овқат тайёрлашни бошлашда, қозонга ҳар бир масаллиқни солишда, “Бисмиллаҳ” деб солсинлар, таомни идишларга сузишда “Бисмиллаҳ” деб сузсинлар,бирор кийим тикиш ёки тўқишда ҳам бисмиллаҳ деб бошласинлар. Гўдакларини кийинтиришда ҳам “Бисмиллаҳ” десинлар ва уларга ҳам бисмиллаҳ дейишни ўргатсинлар.

Ҳинд олимларидан бирининг аёли: Бир таомни тайёрлашни бошлаб, то дастурхонга тортгунимча, ўн олти маротаба бисмиллаҳни айтдим деганлар.Бисмиллаҳ ила пиширилган таом инсон ичига нур бўлиб киради ва қалбига ва танасига шифо бўлади.

Хуллас, кундалик барча ишларимизни “Бисмиллаҳир роҳманир роҳийм ” билан иш бошлашни, одат қилиб олайлик.Чунки, “Бисмиллаҳ ” шундай амалки, уни айтиб юришда бирор меҳнат ва машаққат йўқ. Аммо озгина эътиборли бўлиб, ушбу калимани кўп айтиб юришга одатланилса, инсоннинг номаи аъмолига тўхтовсиз савоблар ёзилиб туради. Бу амалнинг баракотидан бир қарашда дунёвий иш бўлиб кўринган барча ишларимиз ҳам ибодатга айланиб кетади.

Ҳар бир ишини “Бисмиллаҳ” билан бошлаётган мўъмин, Аллоҳ таолонинг тавфиқи ва ёрдамисиз ҳеч бир иш охирига етмаслигини эътироф қилади. Бу эътирофининг натижасида дунёдаги барча ишлари диннинг бир бўлаги ва ибодат бўлиб кетади.

Видео КИМ КУРОНДАГИ 19-ТА ФАРИШТАДАН НАЖОТ ИСТАСА УШБУ ОЯТНИ ХАР ДОИМ АЙТИБ ЮРСИН ОЯТ 19ТА ХАРФДАН ИБОРАТ канала Najot Yo'li