Науқастар жедел жәрдем шақырса да неге шұғыл көмек ала алмайды?

Қызылорда облысында жедел жәрдем қызметкерлері өздеріне келетін қоңырауларды 112 орталығының қабылдауына қарсы. Айтуларынша, бұл орталықта мүлде медициналық біліктілігі жоқ мамандар жұмыс істейді. Соның кесірінен жедел жәрдем шақырған науқастар дер кезінде тиісті көмек ала алмай, соңы қайғылы жағдайларға әкеліп жатыр дейді. Жедел жәрдем шақыртуларын 112 қызметі қабылдайтын жоба цифрландыру бағдарламасы аясында жүргізілген еді.
Қызылордада бұдан былай жедел жәрдем шақыртуларын 112 орталығындағы операторлар қабылдайтын болған. Бұл бәрінен бұрын науқастарға қиын дейді жедел жәрдем қызметкерлері. Айтуларынша, диспетчерлік орталықта арнайы маманы жоқ. Соның кесірінен медицина қызметкерлері шақыртуға кеш жетеді. Ал 103 қызметкерлері мұндай жаңашылдық енгізілмей тұрғанда өздеріне тікелей қоңырау шалған науқастарға жедел жәрдем жеткенше телефон арқылы да кеңес беретінбіз дейді.
ҒАЛИЯ НҰРСЕЙІТОВА, Қызылорда облыстық жедел жәрдем станциясы бас дәрігерінің орынбасары:
– Жүрек талмасы болсын, тырысқақ болсын, тіпті телефон арқылы босандыруы бар жедел жәрдем бригадасы жетем дегенше осындай функцияларымыз болды біздің. Мұны 112 қызметкерлері жасай алмайды. Себебі маман сертификаты жоқ. Отставкадағы МАИ қызметкерлері.
Жедел жәрдем қызметіндегілер бұған дейін медициналық көмек беріп көрмеген 112 қызметкерлері телефон арқылы науқастың қандай жағдайда екенін де біле алмай әуреге салады дейді. Тіпті шақырту берген мекен-жайларды шатыстырып алған кездер болыпты.
ЛӘЗЗАТ МЕДЕТОВА, Қызылорда облыстық жедел жәрдем станциясы оперативтік бөлімінің аға дәрігері:
– 112 тарапынан шақырту алған кезде денсаулық категориясын ажырата алмай, қасындағы 103 диспетчерінен көмек сұрап, уақыт жоғалтады. Уақыт жоғалту біздің шақыру тобындағы дәрігерлерге кері әсер етеді. Біз дер кезінде бармай, науқасты құтқара алмайтын кездер болып жатады.
Бұл жайында жедел жәрдем станциясының басшылары жауапты басқармаларға бірнеше рет шағымданғандарын айтады. Алайда нәтиже болмапты. Ал 112 қызметінің басшысы орталыққа медициналық білімі бар мықты мамандарды жұмысқа ала алмай отырғандарын мойындайды. Өйткені мұнда төленетін жалақы аз дейді.
ОҢДАСЫН ӨТЕБЕКОВ, Қызылорда облыстық жедел әрекет ету орталығының директоры:
– Америкалық, Еуропалық стандарттарға сай келу үшін Қазақстан республикасының цифровизация аясында жасап жатқан жұмыстары. Біздің ережеміз, тапсырмамызбен қазір цифрлық даму министрлігі айналысады.
Сонымен қоса жедел әрекет ету орталығы қазір 101,102, 109 қоңырауларын да қабылдайтын болған. Ал жедел жәрдем қызметіндегілер цифрландыру арқылы шетелдік стандарттарды енгіземіз деп жүргенде науқастар тиісті емін ала алмай жатыр деп наразы.
Абай Нұржанұлы, Рахымжан Ысқақов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#112 #наразылықтар #жедел_жәрдем #Қызылорда

Видео Науқастар жедел жәрдем шақырса да неге шұғыл көмек ала алмайды? канала Информбюро 31