Дзæуджыхъæуы хатдзæгтæ скодтой профессионалон дæсныйады чемпионат «Абилимпикс»-æн

Дзæуджыхъæуы профессионалон дæсныйады чемпионат «Абилимпикс»-æн кæронбæттæн скодтой. Цæгат Ирыстоны цæуы цыппæрæм хатт. Архайдтой дзы, йе 'нæниздзинад хъыгдæрд кæмæн у, уыцы скъоладзаутæ æмæ студенттæ. Дæсныйæдты нымæц азæй азмæ кæны фылдæр. Абон чемпионаты уæлахиздзауты кадджын уавæры схорзæхджын кодтой Дзæуджыхъæуы 5-æм профессионалон училищæйы. Мадзал ацыд эпидемиологон уавæр хынцгæйæ. Бæлвырддæр радзурдзæн Дзæдзойты Фатимæ.

Сценæмæ радыгай хонынц абоны бæрæгбоны сæйраг хъайтарты - чемпионат «Абилимпикс»-ы уæлахиздзауты. Кады гæххæттытæ, майдантæ, æхцайы премитæ. Хицæн компитенциты уæлахиздзаутæ систы Дзасохты Элеонорæ. Компетенци «Лозоплетение»-йы йæ банымадтой хуыздæрыл. Салхъазанты Даниилхуыздæр бакуыста текстыл, Юлия Попова биссерæй быйынæй разынд сæрæндæр.

Ерысты сæйрагдæр нысан- фæсивæдæн фидæны дæсныйад равзарынæн баххуыс кæнын. Сывæллæттæй бирæтæ «Абилимпиксы»-ы раздæр дæр архайдтой, ныр сæхи ногæй сфæлтæрын сфæнд кодтой. Зæгъæн ис уый, æмæ сæ æнтыстдзинæдтæ фылдæр кæнынц. Болататы Каринæйы банымдтой хуыздæр чъирифыцæгыл.

Ерысы архайджытæ, йæ аразджытæ, эксперттæ, бархионтæ кæй балымæн сты, ууыл дзурæг у сæ къамтæ иумæ кæй истой, уый. Кæрæдзимæ дарынц хæларзæрдæ ахастдзинад.

Цыппæрæм регионалон чемпионаты архайдтой 87 скъоладзауы æмæ студенты нæ республикæйы æппæт районтæй ерыстæ кодтой 12 компетенцийы. Се `хсæн «Обработка текста», «Сфæлдыстадон дизайн» æмæ æндæртæ. Ацы аз ма дзы фæзынд ног компетенци «Бейби», зæгъгæ. Уым сæ арæхстдзинад равдисыны бар ис сабитæн.

Чемпионат «Абилимпикс»-ы уæлахиздзаутæм арфæйы ныхæстимæ фæсидт республикæйы ахуырад æмæ наукæйы министры хæдивæг Алыккаты Алан.

Уæлахиздзинад чемпионаты сæйраг нæу. Йæ хæс у, йе `нæниздзинад хъыгдæрд кæмæн у, уыдонæн баххуыс кæнын фидæны дæсныйæдтæ равзарын. Бирæ арфæйы ныхæстæ ракодтой регионалон ерыстæ кæй фæрцы сырæзтысты, уыдонæн дæр. Уæлдай бузныг загътой ахуырдзауты чи бацæттæ кодта, уыцы ахуыргæнджытæн. Уыдон цин кæнынц сæ хъомылгæнинæгты алы æнтыстыл дæр.

Националон чемпионатмæ балцæг райстой ерысты 12 архайæджы. Нæ бæстæйы 84 регионæй 800 адæймагæй фылдæры `хсæн æвдисдзысты нæ республикæ. Падемийы аххосæй 23-æм - 28-æм ноябры финал ацæудзæн онлайн хуызы.
_________________________
Мы рядом в:
vk.com/irystontv
instagram.com/irystontv
youtube.com/irystontv
twitter.com/irystontv
ok.ru/irystontv

Видео Дзæуджыхъæуы хатдзæгтæ скодтой профессионалон дæсныйады чемпионат «Абилимпикс»-æн канала iRYSTON TV