Оқушыларға тегін үйірме ашып, өнерге баулыған кәсіпкерлер мемлекеттен еңбек ақысын ала алмай жүр

Шымкентте оқушыларға тегін үйірме ашқан 160-қа жуық кәсіпкер, "маңдай термен тапқан еңбек ақымызды ала алмай жүрміз" деп шағымданды. Сөздерінше, олар ғимарат пен мұғалім жалдап 55 түрлі үйірмеде балаларды баулыған. Ал, мәдениет басқармасы бұл қызметтері үшін оларға әр балаға шаққанда ақысын төлеуі керек еді. Бірақ, қызмет көрсетушілер есепті толыққанды тапсырғанымызға қарамастан, басқарма басшылығы себепсіз ақшамызды бермей отыр дейді.
Мәдениет басқармасының басшысы бізді үнемі осындай сөздермен шығарып салады деген кәсіпкерлер, үйірме ашып балаларды өнерге тегін баулығандарын айтады. Бірі жеке кәсіпкерлікпен, екіншісі серіктестік құрып мемлекеттік тапсырысты орындапты. Бұл бастаманы әсіресе ақылы үйірмені қалтасы көтермейтін ата-аналар қуана қолдаған. Ал бұл қызметтерінің ақысын мәдениет басқармасы төлеуі керек болған. Бірақ, маңдай термен тапқан еңбек ақымызды әлі де ала алмай жүрміз дейді кәсіпкерлер.
АЙБАРШЫН ҚАЛЫБАЙҚЫЗЫ, Шымкент қаласының тұрғыны:
– Әр айдың қаржысын осылай талап етеміз біз?! Үш рет, төрт рет жиналамыз. Әкімшілікке де бардық. Әр айда осылай. Өз жұмысымыздың ақысын төлету үшін осылай келіп, жиналып айқай-шу шығармасақ ақшамыз төленбейді. Мәдениет басқармасы өз жұмысын дұрыс атқара алмайды.
Шағымданушылар, келген әр бала үшін табель толтырғандарын айтады. Нормативтік құқықтық заңнамаға сай сол табельдерді тексеру әр айдың 1 мен 5 аралығында жүзеге асуы тиіс дейді. Алайда, басқармадағылар тексеру былай тұрсын, кейбірімізден табельдерді әлі қабылдамады деп отыр.
РАИЛЬ ФАЙЗУЛЛИН, Шымкент қаласының тұрғыны:
– Ай сайын жан басына шаққанда төленетін қаржы кешігеді. Табель қабылдауда, счет-фактура қабылдауда, төлем жасауда, барлығында кешігу болады. Соңғы жарты жыл көлемінде ол әдетке айналды.
Ақшасын ала алмағандар алдымен мәдениет басқармасы басшысының қабылдау бөлмесі алдына, кейін Шымкент әкімдігі ғимаратына барды. Алайда шағым иелеріне ешкім шықпады. Басқарма басшысы орнында жоқ деген қала әкімдігінің баспасөз қызметі, кейін сұхбат беретін жауапты маман да жоқ деді. Кейін жазбаша жауап берді.
ШЫМКЕНТ ҚАЛАСЫ ӘКІМДІГІНІҢ БАСПАСӨЗ ҚЫЗМЕТІ:
– Шымкентте мемлекеттік шығармашылық тапсырыс бойынша 35 825 ваучер активациядан өткен. Ақпан айында 159 қызмет берушіден атқарылған жұмыстары бойынша 480-нен астам табель келіп түсті. Оларды 2 маман ғана тексеріп қабылдағандықтан, тексеру ұзақ уақыт алуда. Мемлекеттік шығармашылық тапсырыстың ережесіне сәйкес, төлемдер әр айдың 18-не дейін жасалынатын болады.
Алайда шағым берушілер бұл айтқанмен келіспейді. Өйткені мәдениет басқармасы кейбірінен себебін түсіндірместен тіпті табельдің өзін қабылдамай тастады деп отыр. Бір қызығы барқарма басшылығы оны «не қате, не жарамсыз» деп те танымаған.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Шымкент #мәдениет #еңбекақы_дауы

Видео Оқушыларға тегін үйірме ашып, өнерге баулыған кәсіпкерлер мемлекеттен еңбек ақысын ала алмай жүр канала Информбюро 31