Ўзбекистоннинг Афғонистон билан чегараси тинч, хавотирга ўрин йўқ!

Ўзбекистонни Афғонистон билан боғловчи Ҳайратон («Дўстлик») кўприги атрофидаги вазият бутунлай барқарорлашгани ҳақида хабар берилган эди. «Ўзбекистон 24» телеканали ушбу кўприкдан олинган видеолавҳани эълон қилди.
Унда кўприкдаги вазият тинч ва афғонистонликлардан ҳоли эканлиги, чегара қўшинлари томонидан қўриқланаётганини кўриш мумкин.
Эслатиб ўтамиз, 14 август куни Афғонистон шимолидаги Мозори-Шариф шаҳри (Термиздан 58 километр жанубда жойлашган) «Толибон» қўлига ўтгани маълум бўлганди. Шаҳар топширилгач, Афғонистон мудофаа ва хавфсизлик кучлари Ўзбекистон билан чегара томон чекинди, 15 августга ўтар кечаси Ҳайратон ва Термиз оралиғидаги кўприкда юзлаб афғонистонликлар тўпланди.

15 август тонгида Ўзбекистон томони Афғонистон Қуролли Кучларининг ҳарбий хизматчиларидан иборат 84 кишилик гуруҳни қабул қилгани (улар орасида уч нафар ярадор ҳам бўлган), улар ДХХ Чегара қўшинлари томонидан қўлга олиниб, Ўзбекистон ҳудудида вақтинча бўлиб туриши ташкил этилгани маълум бўлди. Шу куни соат 10:00 ҳолатига кўра, ушбу кўприкдаги вазият юмшади. Афғонистонликларнинг асосий қисми кўприкни тарк этди. Пешинга яқин эса Ҳайратон кўприги атрофидаги вазият бутунлай барқарорлашди.

Ўзбекистон расмийларининг маълум қилишича, Афғонистон билан чегарада барча хавфсизлик чоралари кўрилган.

Видео Ўзбекистоннинг Афғонистон билан чегараси тинч, хавотирга ўрин йўқ! канала UZBEK TV