General Muradov Xankəndidə erməni milyonçularla nə danışıb? - Politoloq Azad Məsiyev CANLI-da...

“2005-ci ildə Azərbaycanda narıncı inqilab təşkil etmək istəmişdilər. Artıq narıncı bantları başlarına bağlamışdılar, narıncı çadırlar gətirilmişdi. Nə idi məqsəd? Məqsəd satqınları hakimiyyətə gətirmək, onların əli ilə Qarabağı ermənilərə vermək və Azərbaycana rəhbərlik etmək idi.
Mən bunu qoymurdum, ona görə bəzi xarici paytaxtlarda qərar verildi ki, İlham Əliyevi devirməliyik. O vaxt da narıncı inqilab dəbi var idi. Orada-burada inqilablar baş verirdi. Bu inqilabların axırı nə oldu? İndi hər kəs bunu görür”.
Prezident İlham Əliyev aprelin 12-də Hərbi Qənimətlər Parkında bu sözləri ilə tarixə ekskursiya etdi. Bəs həmin paytaxtlar hansı idi, doğurdanmı İ.Əliyevi devirməklə hakimiyyətə gələcək qüvvənin əli ilə Qarabağı ermənilərə birdəfəlik təslim edəcəkdilər? Rəngli inqilablar, “ərəb baharı” bizdə niyə baş tutmadı?
Prezidentin növbəti mesajı isə “İsgəndər-M” raketləri ilə bağlı oldu. Dövlət başçısı “cavab gözləyirik” bəyanatı ilə Rusiya, yoxsa Ermənistandan izahat tələb edirdi?
Sitat: “Hardandır bu raketlər Ermənistan ordusunda? Bu raketlər olmamalı idi. Artıq bu, əyani sübutdur. Ermənistanın hərbi cinayətinin sübutudur və biz cavab istəyirik. Bu ölümcül silah Ermənistanın əlinə necə düşdü? Hələ ki, cavab ala bilməmişik. Amma alacağıq. Hər kəs gəlsin, görsün”. Ekspertlər hesab edirlər ki, bu suallar Rusiyaya ünvanlanıb.
Rusiya demişkən, Kreml ATƏT-in Minsk Qrupunun qulpundan niyə əl çəkmir?
Rusiya Federasiya Şurasının beynəlxalq məsələlər üzrə komitəsinin sədri Qriqori Karasin “Kommersant” nəşrinə müsahibəsində deyib ki, Minsk Qrupunun egidası altında Azərbaycan və Ermənistanın xarici işlər nazirlərinin müntəzəm görüşlərinin keçirilməsi təcrübəsini bərpa etmək olar və bu, əhəmiyyətli beynəlxalq rezonans əldə edə bilər.
O, bildirib ki, rəsmi Vaşinqton və Paris bu işdə faydalı rol oynaya bilər. Moskva Minsk Qrupunu niyə xortladır?
Yeri gəlmikən, sülhməramlıların komandanı Rüstəm Muradov Xankəndidə iki biznesmenlə - bank sahibi Artak Balayan və milyonçu Armen Balayanla nahar edib.
Armen Balayan Robert Köçəryana yaxınlığı ilə tanınır. Bu naharın Putinin Köçəryanla videformatda görüşündən sonra olmasının səbəbi varmı? Bu o anlama gəlirmi ki, Rusiya İrəvanda Köçəryan, Xankəndidə quldurbaşı Vitali Balasanyan komandasını gücləndirir?
Rusiyanın daha bir qıcıq doğuran fəaliyyəti Ukrayna siyasətidir və hətta Türkiyəyə qarşı açıq çıxışlara başlayıblar. Belə ki, Rusiya xarici işlər naziri Sergey Lavrovun “erməni damarı” tutaraq Türkiyəyə xəbərdarlıq edib. O, Ukrayna münaqişəsindən danışarkən “Rusiya Türkiyə və digər ölkələri Ukraynada militarist ab-havanı qızışdırmaqdan çəkinməyə çağırır. Kiyevdəki rejim ağılsız addımlar ata bilər ki, bunun da axırı pis qurtaracaq” deyib. Rusiya-Ukrayna müharibəsi realdırmı? Ankara danışıqlar yolu ilə problemi çözə biləcəkmi?

Bütün bu məsələləri MusavatTV-nin canlı yayınında aparıcı Emil Salamoğlu Strateji Planlaşdırma və Araşdırmalar İnstitutunun rəhbəri Azad Məsiyevlə müzakirə edir.

Видео General Muradov Xankəndidə erməni milyonçularla nə danışıb? - Politoloq Azad Məsiyev CANLI-da... канала Tv Musavat