Гулчеҳра Нуруллаева: Шоҳлар ҳузурида эмаклаш нечун?

"Ёзарнинг саси" рукнида Элтуз Ўзбекистонлик таниқли шоира Гулчеҳра Нуруллаева фикрларини эътиборингизга тақдим этади.

"Горбачевнинг ошкоралик сиёсати барчамизнинг кўзимизни очиб юборган эди. Бизнинг авлод советлар руҳида тарбияланган эди.

Мустақилликка мен бир ишонч ва шубҳа билан кириб келдим. Ишонганим шундан иборат эдики - бундан буён давлатни бир ўзбек бошқаради. Бироқ, биз ишонган одамлар биз кутгандек чиқармикан, деган шубҳа ҳам бор эди... Минг афсуски, шунча давр оҳирида ишончдан кўра шубҳа устун келди.

Мустақиллик аввалида президент Каримов шахсан мени қабул қилиб, икки соат суҳбатлашди. Ўшанда мен унга бир қадар ишонган эдим. У менга "Сиз ва сизлар хоҳлаган тузумни яратамиз. Сиз ва сизлар хоҳлаган жамиятни яратамиз. Фақат менга имконият беринглар, менга вақт беринглар" деб айтди.

Энди кўраяпманки, йилдан йилга аҳволимиз ёмонлашиб борди. Энди буёғига чидаш мумкинмас, деб ўйлайман. Қашшоқлик, фоҳишалик, мардикорлик, тиланчиликнинг ҳаддан ташқари кўпайиши. Бир ҳовуч одамларнинг бойиган сари мутлақо кўзи тўймаслиги.

Улар ҳаддан зиёд бойиб бораяпти, менинг она халқим борган сари қашшоқлашиб бораяпти. Бу мен орзу қилган жамиятнинг бутунлай акси бўлиб чиқди ҳозир.

Шоир ҳеч қачон ёлғон сўзламаслиги керак. Дор тагида ҳам, ўлиб қолган тақдирда ҳам. Минг афсуски, ўзбеклар жуда катта умид боғлаган, қаҳрамонлик унвонлари берилган шоирларимиз Абдулла Орипов ва Эркин Воҳидовлар чин маънодаги сарой булбулларига айланишди.

Мен уларнинг позициясига ҳайрон қоламан. Ҳеч бўлмаса Эркин Воҳидов билан Абдулла Орипов ўз атрофига барча зиёлиларни тўплаганида эди ва улар вақти вақти билар президентга очиқ мурожаатлар қилиб туришганларида эди, жамиятни ҳозиргидай жар ёқасига олиб келиб қўймаган бўлардик, деган ҳаёлларга бораман.

Мана бу қурилишларни айтишади. Уни кўриб ижодкорнинг кўзи қувониши керак. Лекин бир томонда гадойларни, тиланчиларни кўриб турган пайтим уларнинг бир тийинлик қадри қолмайди. Олдин халқим ҳам моддий, ҳам маънавий тўқ бўлсин, ана ундан кейин ўша қурилишларни ўйлайлик.

Аввал таълимни тўғри йўлга солайлик, коррупциядан воз кечайлик, ана унда қурилишлар ярашади.

Мен авлодларимга сираям истамасдим бугунгидай даврни. Кошки бу ҳолат менинг ҳаётимдан ўчиб кетган бўлса, янги бир авлод келса, мен истаган ўша демократик бошқарув бўлса.

Ҳозирги ёшларнинг кўпчилиги кўзи юмуққа ўхшайди. Олдинги даврни улар кўришмаган. Боригаям, йўғигаям кўникиб кетаётган бир авлод. Улар кўп нарсадан маҳрум. Ўз адабиётини, ўз тарихини ўқишмайди. Ўзининг буюкларини билмайди. Ярим манқурт авлод яратилдими дея катта бир шубҳага тушаман...

Менинг назаримда зиёлилар, биринчи навбатда шоир, ёзувчилар айбдор. Биз қанчалик тўғри, росткўй, ҳалол бўлсак Худо бизни бандам дейди. Бу фирибгар, алдамчи, юлғич одамларни Худо албатта қарғаса керак...

Беқиёс дардкашлик ҳиёбонида
Кезгувчи шоирин севарку очун.
Йўқ экан бу ҳатто шоҳ имконида
Шоҳлар ҳузурида эмаклаш нечун.

Гулчеҳра Нуруллаева

Видео Гулчеҳра Нуруллаева: Шоҳлар ҳузурида эмаклаш нечун? канала El Tuz