Бір ай қалды! Билік енді автогаз бен жанармай бағасын енді реттемей ме?

Тұп-тура бір айдан кейін Үкіметтің 180 күнге сұйытылған газ, бензин және дизель отынының бағасына қатысты енгізген шектеу мерзімі аяқталады. Яғни, құнын мемлекет реттеп отырған автогаз, жанармай тағы да басқа тауарлар еркін айналымға шығады. Сөйтіп, бір сәтте-ақ баға қайтадан аспандап кетуі мүмкін. Бірақ жауапты ведомство өкілдері сұйытылған газ ішкі нарықтың қажеттілігін өтеуге толық жетеді деп отыр. Әрі бағаны ұстап тұру үшін заң жобасын әзірлеп жатыр екен. Ал депутаттар бағаны өсіруге жол бермей, қайта түсірудің амалын іздеу қажет деді
Сұйытылған газ бен бензин бағасына қатысты жарияланған мораторий бір айдан соң күшін жояды. Сөйтіп, мұнай өнімдерінің құны қайтадан еркін айналымға шықпақ. Бұл жағдай бағаның күрт көтерілуіне себеп болуы мүмкін екен. Энергетика министрі мемлекеттік органдар бөлшек сауда бағасын реттей алмайды деді. Әрі сұйытылған газ тапшылығы да автогаз құнына айтарлықтай әсер етеді. Айтуынша, қазір бұл салада өндіріс көлемі артып жатқан жоқ. Себебі әбден тозығы жеткен зауыттар жиі бұзылады. Сәйкесінше, өнім көлемі де азаяды.
БОЛАТ АҚШОЛАҚОВ, ҚР энергетика министрі:
– Тапшылықтың негізгі себептерінің бірі - көлеңкелі экспорт болып отыр. Соның салдарынан елге автогаз жетіспейді. Баға да негізсіз өседі. Ал дәл қазір министрліктің сұйытылған газ айналымы мен экспортын бақылауға құқығы жоқ. Сондықтан біз автогазды ілеспе жүк құжаттарын рәсімдеуге міндетті тауарлар тізіміне қосу шаралары қолға алынды. Сондай-ақ, сұйытылған газ сататын жанармай бекеттеріне деген талап күшейтіледі.
Мәселен, алты ай бұрын Үкімет бағаны тұрақтандыру үшін автогаздың көтерме бағасын тоннасына 28 мың, яғни литрі үшін 16 теңге деп белгіледі. Алдағы 180 күнде 20 пайызға қымбаттап, тоннасы 36 мыңға жетеді. Сөйтіп, литріне 2 теңгеге өседі екен.
Ал министрлік әрі қарай да бағаның негізсіз өсуіне жол бермеу үшін ішкі нарықта сатылатын сұйытылған газ айналымын бақылауға алмақшы. Сондықтан «Газ және газбен жабдықтау туралы» заңнамаға толықтырулар пакетін әзірлеп қойған. Алдағы уақытта заң жобасы Мәжілісте ұсынылады екен. Сол арқылы энергетика министрлігі автогаздың бөлшек саудадағы шекті бағасын белгілеуге мүмкіндік алады.
БОЛАТ АҚШОЛАҚОВ, ҚР энергетика министрі:
– Біз алдағы алты айға тыйым салуды емес, бақылау енгізуді көздеп отырмыз. Яғни, біз көтерме бағаны белгілейміз. Бірақ бөлшек сауданың шекті құнын бекіте алмаймыз. Ал келесі жылы заң күшіне енеді. Сол кезде ғана бөлшек сауданың шекті бағасын заңнамалық түрде белгілей аламыз.
Бірақ кейбір депуттар министрдің ұсыныстары мәселені түбегейлі шешпейді деп отыр. Айтуларынша, үкіметке де, халыққа да тиімді болуы үшін экспорт көлемін ұлғайту қажет. Сол арқылы өндіріс ошақтарын жөндеп, бағаны да реттеуге болады екен.
ҒАЛЫМ ӘМІРЕЕВ, ҚР Парламенті Мәжілісінің депутаты:
– Бүгінгі көтерілген министрлік тарапынан мәселелер тек осы тарифке байланысты болды. Біз өзіндік бағадан төмен сатып жатырмыз дейді. Сол кезде қайда болды? Баға үш есе кетіп қалған кезде. 120 теңгеден сатылған кезде. Сұйытылған газ. Енді келіп, неден өзіндік құнынан төмен сатып жатыр екенбіз газды.
Депуттаттар үкімет әлі кешегі өзгертулерді толық түсінбеді деді. Айтуларынша, енді негізгі заңда «Жер және оның қойнауы, су, өсімдіктер және жануарлар әлемі, басқа да табиғи ресурстар халыққа тиесілі. Мемлекет халық атынан меншік иелігін жүргізуге құқылы» деп өзгертілгендіктен газ да елге мейілінше қолжетімді болуы тиіс.
Нұрболат Жаңабекұлы, Влад Шишко
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#автогаз #жанармай #баға

Видео Бір ай қалды! Билік енді автогаз бен жанармай бағасын енді реттемей ме? канала Информбюро 31