«Информбюро» көтерген мәселелер қалай шешімін тауып жатыр? Қысқаша шолу

Осыдан 20 күн бұрын біз Жаркент перзентханасындағы ана мен бала өлімі жайлы материал көрсеткен едік. Алматы облысындағы жантүршігерлік оқиға біздің көрермендерімізді бей-жай қалдырған жоқ. Информбюроның әлеуметтік желідегі ресми парақшасында істің барысын сұрап жатқан оқырмандарымыз көп. Бүгін біз жалпы «Информбюро» ұжымы көтерген мәселелер қалай шешіліп жатқандығына қысқаша шолу жасағанды жөн көрдік.
САМАЛ ҚАБЫШЕВА, тілші:
– Жаркент перзентханасында болған ана мен бала өлімі бойынша істе ілгерлеушілік бар. Жаркент тұрғындары шағым көп айтқан, ана мен бала өлімі болған Панфилов аудандық көп салалы аурухананың бас дәрігері Төлеу Сарпеков осы қайғылы жағдайдан кейін өз еркімен жұмыстан кетті. Ал үшінші баласына босанамын деп барып, перзентханада қансырап көз жұмған 24 жастағы Жанар Баратоваға жасалған сараптама қорытындысы әлі шықпады. Сондай-ақ, біздің жақсы жаңалығымыз бар. Осыдан төрт ай бұрын қос жанары бірдей көрмейтін Айгүл Иманберлинова жайлы біз Информбюродан көрсеткен болатынбыз. Жаны жомарт жандардың қолдауының арқасында мүгедек жан үйлі болды.
РУСЛАН ЖАСҰЛАНҰЛЫ, тілші:
– Ал солтүстікте халықтың жері аукцион арқылы сатылмайтын болды. Айыртау ауданындағы бес ауылдың тұрғындары 42 мың гектар жер заңсыз сатылып жатқанын айтып, үш жүзге жуық адам әкімдіктің алдына жиналған. Бір жылдың ішінде жерді сатуға жол бермей, инвесторды аппеляция, кассациялық сотта жеңіп, жиналыс хаттамасын заңсыз деп тану туралы шешімге қол жеткізді.
ОРЫНБАЙ АТЫҒАЕВ, тұрғын:
– Енді осы сот біздің пайдамызға шешілсе, жеріміз түпкілікті халыққа қайтарылады. Бес ауылдың халқы ол 882 пай.
МАХАББАТ НҰРЖАНҚЫЗЫ, Тілші:
– Маңғыстау облысында да үйіне табиғи газ тарта алмай жүрген тұрғындардың мәселесі шешілді. Біз осы тақырыпты былтыр желтоқсан айында эфирден көрсеткен едік. Қазір Мұнайлы ауданы әкімдігінің мәліметінше Айрақты, Шерқала, Бесшоқыдағы 426 үйге табиғи газ жүргізілген. Ал қалған 210 үй әлі келісімшарт жасамаған. Сондай-ақ, дәл осы тұрғындарға алғашында жер шаруашылық қожалығы ретінде берілген еді. Алдағы бес айда жер бас жоспарға тұрғын үй ретінде енгізілмек.
ЖАНБОЛАТ САНИЯЗ, тілші:
– Ал шығыста көтерілген мәселелердің кейбірі әлі шешімін тапқан жоқ. Мәселен, ақпан айында Ұлан ауданы Жаңа Қанай ауылының тұрғындары шошқа фермасының салынуына қарсы шықты. Құны жүз он жеті миллиард теңге болатын бұл фермада жылына төрт жүз мың бас шошқа өсірілу жоспарланған. Сол кезде қарсы болған халық әкімдіктен жауап ала алмадық дейді. Бұдан бөлек, Катонқарағай ауданындағы пайға берілген жерлерін бөліп ала алмай жүрген Қатонқарағай ауданы тұрғындарының да мәселесі аяқсыз қалды. Тіпті жер иелерін жеке қабылдап, уәде берген аудан әкімі Дидар Қалиханұлы да сөзінде тұрмады дейді.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#Информбюро #Ақиқатын_айтайық

Видео «Информбюро» көтерген мәселелер қалай шешімін тауып жатыр? Қысқаша шолу канала Информбюро 31