Атқарған жұмыстарының ақысын ала алмай жүрген 85 қазақстандық компания министрден көмек сұрап келді

4 айдан бері 85 қазақстандық компания атқарған жұмыстарының ақысын ала алмай жүр. "Әскери құрылыс" жауапкершілігі шектеулі серіктестігі кәсіпкерлерге 1 миллиард теңге ақшасын бермей қойған. Бір айдан кейін қарызды толық өтейміз деген мердігер компания жауапсыз отырған көрінеді. Бұған дейін бірнеше қалада жиналып шағымын айтқан кәсіпкерлер енді Қорғаныс министрінен көмек сұрап Нұр-Сұлтанға келді.
Қазақстанның әр өңірінен жиналған кәсіпкерлердің ішінде Шыңғыс та бар. Ол өткен жылы Алматы облысындағы Қорғаныс министрлігіне қарасты әскери бөлімдерге құрылыс материалдарын жеткізген. Енді 4 айдан бері атқарған жұмысының ақысын ала алмай жүр. "Әскери құрылыс" жауапкершілігі шектеулі серіктестігі Шыңғыс иелік ететін "Гормонтаж Ақтөбе" компаниясына 180 миллион теңге берешек.
ШЫҢҒЫС ТАЛҒАТОВ, кәсіпкер:
– Салық органдары біздің шоттарымызды бұғаттап тастады. Қаншама адам жалақысыз отыр. Жұмыс істейік десек ақша жоқ. Бүгін шу шығарайық деп кеп тұрған жоқпыз. Үкіметтен көмек сұраймыз. Министрлік біздің ақшамызды берсін де, "Әскери құрылыстағы" қаражаттың қайда кеткенін өзара анықтай берсін.
Алашағын ала алмай жүрген кәсіпкерлердің ішінде келісімшартты орындау үшін несие алғандар да бар екен. Кейін ақшаны алған соң банк алдындағы қарызды жауып тастаймыз деп үміттенген. Енді олар жалақыдан бөлек несие пайызын қалай қайтарамыз деп дал.
Ал Қорғаныс министрлігі бұл мәселе қатысымыз жоқ деп отыр. Өйткені "Әскери құрылыс" жауапкершілігі шектеулі серіктестігі ұсынған құжаттар бойынша ақшаны компанияның шотына аударған. Алайда қаражат жұмысты атқарған кәсіпкерлерге жетпей қалған.
МҰХАМЕДЖАН ТАЛАСОВ, ҚР Қорғаныс министрінің орынбасары:
– Филиалдарда тексеру жұмыстарын жүргізіп жатырмыз. Тексеру барысында бағаны 10 есеге дейін көтеру фактілері анықталып жатыр. Енді бұны құқық қорғау органдары бақылауына алар. Одан кейін серіктестік Қорғаныс министрлігі тапсырыс бермеген, қажет емес құрылыс материалдарын сатып алған. Мұның бәрі жіті зерттеліп, кінәлілер анықталады.
Әзірге Қорғаныс министрлігі қолдан келгенді жасамақ. Әуелгі жұмысты пайдаланылмаған құрылыс материалдарын кәсіпкерлерге қайтарып беруден бастамақ. Ал оған келіспегендер шілдеде аяқталатын қаржылық тексеру нәтижесін күтеді. Тексеру аяқталғанша "Әскери құрылыс" жауапкершілігі шектеулі серіктестігінің шоттары бұғатталып, бұрынғы басшысы жұмысынан босатылған.
Гүлназ Сайлауқызы, Дидар елеуов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ӘскериҚұрылыс #еңбекақысыз_жұмысшылар

Видео Атқарған жұмыстарының ақысын ала алмай жүрген 85 қазақстандық компания министрден көмек сұрап келді канала Информбюро 31