Қымбатшылықтың қамытына жегіліп, «тас ғасырына» кетіп жатырмыз

Қымбатшылықты әзірге Үкімет те, ешбір шенеунік те тоқтата алмайтын секілді. Тура бір жыл бұрын "азық-түліктің аспандап бара жатқанын" айтып, жауаптыларға дабыл қаққан депутаттар бүгін қымбатшылықтың қамытына әбден жегіліп, қайтадан "тас ғасырына" кетіп жатырмыз деді. Тіпті, Үкіметтің: "Қазақстандағы табысы күнкөріс деңгейінен төмен халықтың саны 998 мың" дегеніне де сенбейді. Мәжілісмендердің есебінше Қазақстанның ең төменгі күнкөріс деңгейі әлемдегі ең кедей: Нигерия, Ангола, Венесуэла, Габон сияқты елдермен бірдей. "Қарақұмықтың бағасы қара уылдырықтың құнымен бірдей болды" деген депутаттар енді табысы аз азаматтарға тегін азық-түлік картасын үлестіруді ұсынып отыр.
Жаңа төраға келіп, жаңа деммен іске кірісейік деді ме, әйтеуір бүгін мәжіліс депутаттарының біразы халықтың жоқшылыққа батып бара жатқанын айтты. Шенеуніктердің кедейлер туралы статистикасына сенбейтін Ерлан Саиров қазір елімізде кемінде 1,5 миллион адам кедей деп отыр. Оның есебінше Қазақстандағы ең төмен күнкөріс деңгейі адам басына шаққанда 2,8 доллар, яғни: 1090 теңгеден сәл асады.
ЕРЛАН САИРОВ, ҚР Парламенті Мәжілісінің депутаты:
– Халықтың ең аз қамтылған 40 пайызы өз бюджетінің 59 пайызын азық - түлік өнімдеріне жұмсайды. Кедейлік шегі, ең төменгі күкөріс шегінің, яғни 36 мың теңгенің 70 - пайызын құрайды. Бұл ертедегі Үкіметтегілердің халыққа ақшаны аз төлеу үшін істеп қойған «қулығы». Яғни, әлеуметтік көмек алғың келсе, «сіңір кедей» болуың керек!
Үкімет биыл ең төменгі күнкөріс деңгейін 36,018 теңге деп бекіткен. Бірақ, мемлекеттен атаулы көмек алу үшін ресми жұмыс істеп, кедейшілік шегінде болуыңыз шарт. Яғни, бір айда табатын табысыңыз отбасы мүшесінің санына шаққанда 25212 теңгеден көп болмауы керек. Саировтың мемлекеттік жәрдемақы алғың келсе сіңір кедей болуың керек деп отырғаны да сондықтан. 600 мың теңге жалақы алатын Саиров кедейлік шегін 25212 теңгеден арттыруды ұсынды. Ал, ең төменгі жалақы алатын, яғни айына алпыс мың теңге табатын қазақстандықтарды жеке табыс салығынан босатайық деді. Аманжан Жамалов шұғыл түрде ең төменгі күнкөріс деңгейін 20 пайызға яғни, 36018 теңгеден 43221 теңгеге көбейту керектігін айтты. Бұдан бөлек, зейнетақы мен жәрдемақыны инфляцияның деңгейімен теңестірмесек, бұдан да кедейлене береміз деді. Жоқшылықтан зарыққан жұрттың зәрезап күйінен әбден ашынса керек, Жамалов табысы төмен отбасыларға тегін азық-түлік картасын үлестірмесек халық ашыға береді деп отыр.
АМАНЖАН ЖАМАЛОВ, ҚР Парламенті Мәжілісінің депутаты:
– Ең төменгі күнкөріс деңгейін 43221 теңгеге көбейту үшін 600 миллиард теңге керек. Ол ақшаны ұлттық компаниялардың шығындарын қысқартып, шығара аламыз. Мысалы қазақстанның Даму Банкі. Ал, кедейленіп кеткен 3 миллионға жуық азаматтың жағдайы тұрақталғанша тегін азық-түлік картасын берейік.
Айта кетейік, Үкімет биыл азық-түлік пен жанар-жағармайдың, коммуналдық төлемақылардың бағасын 1-ші маусымға дейін көтеруге шектеу қойып отыр. Алайда, депутаттар бұл уақытша шара, одан кейін тауарлардың қымбаттап кетпеуіне ешкім кепілдік бере алмайды дейді. Жылдық инфляцияның деңгейі дәл бүгін 8 жарым пайыз екенін ескерсек, мәжілісмендер айтқандай "Үкімет қымбатшылыққа қарсы шараларын шұғыл қабылдауы" керек. Кедейленген халықтың статистикасын мықты есептейтін шенеуніктер халықтың тұрмысын нақты қалай жақсартамыз дегенді әзірге айтпады.
Айбар Төлжанұлы, Нұркен Тоқмурзин
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#қымбатшылық #кедейленген_Қазақстан

Видео Қымбатшылықтың қамытына жегіліп, «тас ғасырына» кетіп жатырмыз канала Информбюро 31