Тараз қаласының қоғамдық кеңесі арнайы әлеуметтік көмек көрсету мекемелеріне мониторинг жүргізді

Тараз қалалық Қоғамдық кеңес арнаулы әлеуметтік көмек көрсету мекемелерінің қызметін саралады.
Тараз қалалық Қоғамдық кеңес «АМАNАТ» партиясының Жамбыл облыстық филиалымен бірлесе, аймақтағы арнаулы әлеуметтік қызмет ұсыну орталықтарының жұмыс жағдайына мониторинг ұйымдастырды. Оның барысында, түсінікті тілде айтқанда - қарттар үйлері, зорлық-зомбылықтан зардап шеккендерді қолдау мекемелері және психо-неврологиялық интернат үйінің қызметтеріне үңілді және зерделеу нәтижелерін еліміздің бас партиясының аймақтық филиалы жанындағы Отбасы және халықты әлеуметтік қорғау жөніндегі аймақтық қоғамдық кеңестің орайластырылған отырысында тоқайласқан мүдде тұрғысында кеңінен талқылады.
Айта кету керек, өткір мәселе Тараз қаласы, Асқаров көшесі, 331А мекенжайында орналасқан N5 арнаулы әлеуметтік көмек ұсыну орталығы базасында көшпелі жиын форматында өтті.
Онда, назарға алынған мекемелерде – ғимараттардың арнайы мемлекеттік стандарттарға сәйкессіздігі, ескілігі, жөндеуді қажет етуі, тарлығы, қызмет алушылардың келушілермен кездесудегі шектеулері (айта кету керек, қабылдау күндері заңмен шектелмеген), дәрігерлік құрамның жетіспеушілігі, психикалық ауытқулары бар емделушілердің жүзге жуығына бір ғана бақылаушы маманның қарауға мәжбүрлігі, қарттар үйлеріне қабылданушыларды орналастыру жүктемесі ескерілмейтіндігі, яғни мүмкіндіктеріне қарай бөлініс реттілігін қалыптастырмау сынды кемшіліктер облыс әкімдігінің жұмыспен қамту және әлеуметтік бағдарламалар басқармасының басшысы Гүлдана Жауынбекова және арнайы орталықтар басшыларының назарына ұсынылды.
Жиын төрағасы Сембек Әбетайұлы Сейдәзімов қызмет алушылардың мүдделі мекемелерге аударылған жәрдемақылары мен зейнетақыларының мақсатты жұмсалуында абай болу керектігін баса айтты. Қызмет алушыларға пациент ретінде емес, ең бастысы – «адам» деп қарау қажет деді.
Сонымен қатар, кеңесте егде жастағы жандардың да бос уақытын тиімді өткізуіне айтарлықтай ықпалын тигізетін облыстық «Ұзақ ғұмырлылық орталығының» құрылысы үшін жер телімін таңдау, сантарапты қызметті көрсетуге қауқарлы сапалы ғимаратын тұрғызу мәселесі де назардан тыс қалмады.
Бұл орталықтың қажеттілігі мен мән-мағынасына жиынға арнайы қатысқан облыстық Ардагерлер кеңесінің төрағасы Еркінбек Бейсенбекұлы Солтыбаев жан-жақты тоқталды.
Отырыс барысында барлық тараптың уәждері тыңдалып, соңында кемшіліктерді жою бойынша Қарарлық ұсынымдар қабылданды.

Видео Тараз қаласының қоғамдық кеңесі арнайы әлеуметтік көмек көрсету мекемелеріне мониторинг жүргізді канала Қазақстанның Азаматтық Альянсы