Müharibədə olduğunu 28 gün ailəsindən gizlədən şəhid snayper - REPORTAJ

3 bacının yeganə qardaşı, sevgi ilə xatirələrdə yaşayan Kamran Fərəcov 14 fevral 1996-cı ildə Şirvan şəhərində anadan olub. 2018-ci ilin avqustun 19-da çox sevdiyi Fidan xanımla ailə həyatı qurub.

APA TV-nin Mil-Muğan bürosunun xəbərinə görə, Müddətdən artıq xidmət edən xüsusi təyinatlı baş əsgər Kamran Fərəcov Füzuli, Cəbrayıl, Zəngilan, Qubadlı və Xocavənd istiqamətlərində döyüşlərdə iştirak edib. Oktyabrın 24-də Şuşa şəhərinin 15 kilometrliyində yerləşən Çanaqçı kəndində gedən döyüşlərdə komandiri ilə birlikdə snayper gülləsindən şəhid olub.

Döyüş dostları onu qəhrəman kimi xatırlayır. Sərrast atıcı, peşəkar snayper olub. Eyni zamanda bütün növ silahlardan da peşəkarcasına istifadə edib. Snayper kimi 20 erməni hərbçisini məhv edib.

Onu tanıyanlar hədsiz təvazökar olduğunu, özü haqqında nəyisə paylaşmağı sevmədiyini qeyd edirlər. Yaxınlarını çox sevdiyindən onlardan müharibədə olduğunu 28 gün - şəhid olan ana qədər gizlədib:

Şəhidin atası İlqar Fərəcov Kamran barədə keçmiş zamanda danışmağın onun üçün ağır olduğunu deyir: “Ömrüm boyu hiss edəcəyəm ki, elə yanımdadır. Əsgərlikdə Milli Qvardiyada xidmət edib. Hərbiyə meylli idi. Üç il Qubada xüsusi təyinatlı hərbi hissədə oldu. Sonra bir il də artırdı. Çox tərbiyəli idi. İndiyə kimi Kamran mənə heç vaxt yox deməyib. Həmişə qısa və konkret danışmışıq”.

Atası sonuncu dəfə onu sentyabrın 20-də yas mərasiminə gələn zaman görüb. Deyir ki, elə bil görüşməyə gəlmişdi. Evdəkilərlə də, qonşularla da görüşərək sağollaşıb: “Həmişə mən onunla görüşəndə bir dəfə öpürdüm, bu dəfə gedəndə 2 dəfə öpdüm. Müharibəyə gedəcəyini özü bilirdi, amma bizə demirdi. Fikir etməyimizi istəmirdi. Həftədə bir dəfə zəng edirdi. Deyirdi, bərilərdəyəm. 5 il xüsusi təyinatlıda təlim keçmişdi. Özünə arxayın idi ki, ona heç nə olmaz. Sürpriz etmək istəyirdi ki, desin, mən də müharibədə olmuşam”.

Çoxlu nəvəsi olan nənəsi Bənövşə Fərəcova nəvəsini hamıdan çox istəyirmiş: “Deyirdim mən Kamranla qalacam. Öləndə də məni Kamran götürər”.

Analar üçün övlad itirmək çox çətindir. Həm də düşməni lərzəyə gətirəm belə bir oğul. Şəhidin anası Reyhan Fərəcova onu “ağıllı balam” deyə əzizləyir. Deyir ki, axırıncı dəfə oktyabrın 23-də danışıb oğlu ilə: “Soruşurdum, Kamran, nə var, nə yox, müharibədir? Deyirdi, mən müharibədə deyiləm. Təzyiqim var deyə fikir eləməmək üçün belə deyirdi. “Yaxşıyıq, darıxma” - belə sözlər danışırdı, mən də inanırdım”.

Kamran atasız böyüyən həyat yoldaşı Fidan Fərəcovaya həm ata, həm qardaş, həm də dost olub. Deyir ki, hər şeyin öhdəsindən ikilikdə gəlmişik: “Axırıncı dəfə oktyabrın 23-də səhər danışdım. Həmin günü telefonda şəhidlərə baxıb ağlamışdım. Başqa bir telefonla zəng vurmuşdu, açdım, dedi ki, ağlamısan? Dedim, yox, ağlamamışam, qrip olmuşam. Dedi, ağlama, ağlayacaq heç bir şey yoxdur, hər şey yaxşıdır, özünüzdən muğayat olun. O sözə reaksiya verdim ki, sən bizi fikirləşmə, biz yaxşıyıq, özünü fikirləş. Dedi, narahat olmayın, mən yaxşıyam, hər şey yaxşı olacaq. Mən bilirdim müharibədədir, amma tam döyüşün içində olmasını bilmirdim”.

Kamran müharibədə olduğunu elə sonuncu telefon zəngində etiraf edib: “Sonra elə oldu ki, döyüş bölgəsinə getdi, ta ki, sonuncu dəfə 23 oktyabrda bizimlə danışanda, prezident Cəbrayılı elan edəndə, ilk dəfə dedi ki, mən Cəbrayıldayam. Ona qədər heç vaxt yerini deməyib, elə deyib buralardayam”.

Xanımının sözlərinə görə, Kamran heç vaxt evdə işindən danışmazdı. İşi haqqında ailəvi dostlarından eşitdiklərini özünə deyəndə isə acıqlanardı ki, mən danışmıramsa, sən də heç yerdə danışma: “Sentyabrın 26-dan 27-nə keçən gecə idi, saat 2-də mesaj yazmışdı mənə “neynirsən, yatmamısan?” Dedi, sənə bir söz deyəcəm, axıra qədər qulaq as, bu həyatda tanıdığım ən güclü qadınsan. Sən güclüsən, bilirəm ki, hər şeyin öhdəsindən gələ bilərsən. Onda bir anlıq dedim ki, bu nə deməkdir, nə danışırsan? Dedi, heç nə, bu sözü, sadəcə, sənə deyirəm, bilirəm ki, sən güclüsən! Hər şey də yaxşı olacaq. VSPIŞKA Öz pulqabısında Mübariz İbrahimovun şəklini gəzdirirdi. Sonra elə oldu ki, Polad Həşimov şəhid olanda evdə ancaq bunların videosuna baxırdı. Bir gün dedim ki, Kamran, bu nədir, bu cür oğullarımız torpağın altında yatırlar, heyf bunların canından. Dedi ki, sən bilmirsən şəhadətə ucalmaq nə deməkdir, Bu, hər oğula nəsib olmur, hər oğul bu adı qazanmır. Bir sözü də o oldu ki, mən gələndə Polad Həşimovun da şəklini çıxararsan, pulqabıma qoyacağam. Sən demə, elə o özü də onlarla bərabər oldu”.

Kamran Fərəcov, indi sən Mübariz İbrahimov, Polad Həşimovla birlikdəsən. Rahat uyu, şəhidim, uğrunda şəhid olduğun vətən torpağı azaddır artıq!
Rəsmi facebook səhifəmiz: https://www.facebook.com/tvapaxeber
Rəsmi instagram səhifəmiz: https://www.instagram.com/apatvresmi/
Rəsmi twitter səhifəmiz: https://twitter.com/apatvofficial
#apatv #apaxeber

Видео Müharibədə olduğunu 28 gün ailəsindən gizlədən şəhid snayper - REPORTAJ канала APA TV