Salyan sakininin düzəltdiyi kotan əkinçilərin işini asanlaşdırıb

Salyan sakininin düzəltdiyi kotan görənlərin marağına səbəb olub. Bu kotanın digərlərindən fərqi odur ki, yeri şumladıqda torpağın şoran qatı üzə çıxmır.

38 yaşlı Salyanın Boranıkənd kənd sakini Faiq Rzayevin hazırladığı kotan ikilik list dəmirdən və dəmir borudan düzəldilib. 8 günə ərsəyə gətirilən kotanın hündürlüyü 60-70 santimetrə çatır.

Kənd sakini Faiq Rzayev: “Şveller materialından istifadə edilib. Ağzında bıçaq əvəzi resordur. Kotan şumlayır günə 5-6 hektar, bu isə şumlayır günə 15-20-yə yaxın.”

Faiq Rzayev deyir ki, bu kotan dərinliyə qədər torpağı yumşaltsa da, o biriləri kimi şor hissəsini üzə çıxarmır. Eyni zamanda, traktorun qoşqu hissəsinə qoşulmuş kotanla yer şumlayarkən torpaq narın olduğundan artıq malaya ehtiyac qalmır ki, bu da əkinçini əlavə xərclərdən xilas edir.

Kənd sakini Nabil Rzayev: “Onun həm malası özündəndir, həm də yerin şumu gözəl alınır.”

Sakinlər deyir ki, bu kotan kartof əkini üçün daha əlverişlidir. Yer şumlayarkən kiçik arxlar əmələ gəlir ki, həmin arxlara sıra ilə kartof əkib üstünü torpaqla doldurmaq bəs edir. Əkinçi üçün sərfəli olduğundan sakinlər daha çox bu kotana üstünlük verirlər.

Видео Salyan sakininin düzəltdiyi kotan əkinçilərin işini asanlaşdırıb канала ARB Cenub